Bab Mahkemesi 54 Numaralı Sicil (H. 1102 / M. 1691) cilt: 20, sayfa: 314 Hüküm no: 376 Orijinal metin no: [64b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâime bt. Hasan’ın vasiyeti Mahmiye-i İstanbul’da Karabaş mahallesinde sâkine Sâime bt. Hasan nâm hâtun tarafından husûs-ı âti’l-beyâna vekîl olduğu zâtını ârifân İbrahim b. Osman ve Ramazan Odabaşı b. Osman şehâdetleriyle sâbit olan Müezzin Abdullah Çelebi b. Ramazan nâm kimesne meclis-i şer‘-i şerîf-i enverde, mezkûre Sâime’nin oğulluğu işbu bâ‘isü’l-kitâb Yusuf Bey b. Osman nâm kimesne mahzarında bi’l-vekâle ikrâr ve takrîr-i kelâm edip, müvekkilem mezbûre Sâime Hâtun eşyâ-i memlûkesinden beş dokuma yasdık ve bir beledî döşek ve üç köhne yorgan ve iki minder gılâfı ve iki yan keçesi ve iki köhne kaliçe ve bir köhne alaca kilim ve üç tencere ma‘a kapak ve iki sahan ve bir baklava tepsisi ve iki tâbe ve iki güğüm ve iki kefgir ve iki keçe ve iki ayaklı sandık ve kırk iki dirhem bir sîm ön kuşak ve bir sandal kaplı sincab kürk ve bir neftî zenne ferâcesi ve bir beylik ferâce ve bir tuç havan ve bir sandal kaftanı bi safka-i vâhide mezbûre Yusuf Bey’e zikri âtî vesâyâsını tenfîzde vasiyy-i muhtârı olan işbu hâzır bi’l-meclis Mehmed Çelebi b. el-Hâc Abdülmümin yedime yirmi guruşa bey‘-i kat‘î ile bey‘ ve teslîm, ol dahi vech-i muharrer iştirâ ve tesellüm ettiğinden sonra semeni olan meblağ-ı mezbûr yirmi guruşu vasiyy-i mezbûr Mehmed Çelebi mezbûr Yusuf Bey’den merkūme Sâime’nin emriyle ahz u kabz edip, eşyâ-i mezbûre mezbûr Yusuf Bey’in mülk-i müşterâsı oldukdan sonra merkūme Sâime Hâtun şöyle vasiyyet eyledi ki, mezbûr Mehmed Çelebi makbûzu olan meblağ-ı mezbûr yirmi guruşdan sünnet-i seniyye üzre techîz ve tekfîn ve levâzım-ı defnime kifâyet mikdârı sarf olunup, yine mârru’z-zikr yirmi guruşdan üç yüz bir akçesi iskāt ve salât ve kefâret-i savm için verilip ve eyyâm-ı mübârekede tabh olunup rûhum için it‘âm oluna deyu vasiyyet ve tenfîzine mezbûr Mehmed Çelebi’yi vasiyy-i muhtâr [nasb], ol dahi kabûl edip, bâkī her ne mâlım kalır ise yine mezbûr Yusuf Bey’in olsun deyu vasiyyet ve ol dahi kabûl eyledi dedikde, gıbbe’t-tasdîki’l-mer‘î mâ vaka‘a bi’t-taleb ketb olundu. Fi’l-yevmi’s-sânî aşer min Cumâdelâhire sene 1102. Şuhûdü’l-hâl: Abdülkādir Efendi b. Şaban el-imâm, Musa Beşe b. Osman, İbrahim Çelebi b. Osman, Durmuş ( ) el-imâm, Abdi Çelebi el-müezzin.