Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 59 Hüküm no: 12 Orijinal metin no: [4a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye bt. Beşir Ağa’nın, izni olmaksızın babası tarafından akdedilen nikahının iptal edildiği Fi’l-asl Vilâyet-i Rumeli’nde Mora Sancağı’nda Karitena kazâsına [tâbi‘] Karina nâm karyeden olup hâlâ mahmiye-i İstanbul’da Davudpaşa Mahallesi’nde sâkine Rukiye bt. Beşir Ağa nâm bikr-i bâliğa meclis-i şer‘-i hatîrde Mustafa Beşe b. Hüseyin mahzarında üzerine da‘vâ ve takrîr-i kelâm edip târih-i kitâbdan üç sene mukaddem on sekiz yaşında olup bâliğa iken babam işbu hazır bi’l-meclis mezbûr Beşir Ağa benim iznim yoğiken fuzûlen nefsimi beş yüz esedî guruş mehr-i müeccel üzerine mezbûr Mustafa Beşe’ye ben zikrolunan karyede sâkine iken mahmiye-i mezbûrede inkâh ve tezvîc etmekle hâlâ ben muttali‘ oldukda babam mezbûr vech-i muharrer üzre mezbûr Mustafa Beşe’ye akd-i nikâhını tecvîz etmemişimdir hâlâ mezbûr Mustafa Beşe’den suâl olunup akd-i mezbûrun feshine hüküm taleb ederim dedikde gıbbe’s-suâl mezbûr Mustafa Beşe cevâbında fi’l-vâki‘ târih-i mezbûrda müdde‘iyye-i mezbûre on sekiz yaşında bâliğa olup karye-i mezbûrede sâkine iken babası mezbûr Beşir Ağa mahmiye-i mezbûrede müdde‘iyye-i mezbûrenin izni yoğiken beş yüz esedî guruş mehr-i müeccel üzerine bana inkâh ve tezvîc edip ba‘dehû müdde‘iyye-i mezbûre akd-i mezbûru istimâ‘ eyledikde tezvîc ve kabûl etmişidi deyü def‘le mukābele edicek gıbbe’l-istintâk ve’l-inkâr mezbûr Mustafa Beşe’den müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin fi’l-vâki‘ târih-i mezbûrda babam mezbûr Beşir Ağa mahmiye-i mezbûrede beş yüz esedî guruş mehr-i müeccel üzerine mezbûr Mustafa Beşe’ye inkâh ve tezvîc eyledikden sonra akd-i nikâh-ı mezbûru karye-i mezbûrede sâkine iken istimâ‘ eyledikde tecevvüz ve kabûl etmediğine mezbûre Rukiye’ye yemîn teklîf olundukda ol dahi alâ-vefki’l-mesûl yemîn billâhi’l-aliyyü’l-a‘lâ etmeğin mûcebince akd-i nikâh-ı mezbûrun butlânına ba‘de’l-hükm ve’t-tenbîh mâ-vaka‘a bi’t-taleb ketb olundu. Fi’l-yevmi’l-işrîn min-Şevvali’l-mükerrem li-sene tis‘în ve elf. Şuhûdü’l-hâl: Mehmed Çelebi b. Haydar, Ahmed Çelebi b. Piyale, Ahmed Bey b. Cafer, Mustafa Çelebi b. Ahmed.