Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 60 Hüküm no: 13 Orijinal metin no: [4a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Borcundan dolayı hapiste bulunan Yasef v. İlya’nın salıverildiği Mahmiye-i İstanbul’da Unkapanı hâricinde Balıkpazarı kurbünde sâkin olup hazır bi’l-meclis Mosi v. İlyas nâm Yahûdî’ye cihet-i şer‘iyeden yetmiş buçuk esedî guruş ve gāib ani’l-meclis Yani nâm zimmîye seksen dokuz guruş ve Kosti nâm zimmîye otuz sekiz guruş cem‘an yüz doksan yedi buçuk esedî guruş deyni için yüz günden beri izn-i hâkim ile sicn-i sultânîde habsolunan Yasef v. İlya nâm Yahûdî’nin iflâsı sâbit olursa habsden ıtlâk olunmak bâbında buyruldu-i şerîf vârid olmağın merkūm Yasef’den vech-i âtî üzre istihbâr-ı şer‘î sudûrundan sonra udûl-i Müslimînden olup sâlifü’z-zikr Balıkpazarı kurbünde sâkin Mehmed b. Abdurrahman ve diğer Mehmed Bey b. İbrahim ve Mehmed Çavuş b. Abdullah ve es-Seyyid Hasan Çelebi b. es-Seyyid Mahmud ve Musa b. Abdullah nâm kimesneler li-ecli’l-ihbâr meclis-i şer‘a hâzırûn olup fi’l-vâki‘ düyûn-ı mezbûresi için yüz günden beri sicn-i sultânîde mahbûs olan müstahber-i merkūm Yasef müflis ve mu‘dim ve fakīr olup üzerine lâbis olduğu eşyâsından gayrı ism-i mâl ıtlâk olunur şey’i ve bir habbesi olmayıp merkūm Yasef’in ısârı ma‘lûmumuzdur deyü her biri alâ-tarîkı’ş-şehâde merkūm Mosi muvâcehesinde haber verdiklerinden sonra medyûn-ı merkūm Yasef’in nefsine ve hîn-i mutâlebede meclis-i şer‘a ihzârına diğer Mosi v. Mordehay nâm Yahûdî emir ve kabûlü hâviye kefâlet-i sahîha ile kefîl olmağın kudret ve yesârı zâhir oluncaya değin merkūm Yasef habsden ıtlâk birle mâ-hüve’l-vâki‘ bi’t-taleb ketb olundu. Fi’l-yevmi’l-işrîn min-Şevvali’l-mükerrem li-sene tis‘în ve elf. Şuhûdü’l-hâl: Hüseyin Efendi b. Hasan, Abdülfettah Efendi b. Himmet, Mahmud Çelebi el-mukayyid, Mehmed Çelebi b. Haydar.