Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 62 Hüküm no: 15 Orijinal metin no: [4b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Sâliha bt. Malkoç’un kızkardeşi Ayşe’nin mirastan kendi hissesine düşen payı aldığı Mahmiye-i İstanbul’da Hadîce Sultân Mahallesi’nde sâkine iken bundan akdem vefât eden Sâliha bt. Malkoç nâm hatunun verâseti zevc-i metrûkü Mustafa b. Bâyezid’e ve li-ebeveyn kız karındaşı Âişe’ye münhasıra olduğu şer‘an sâbit ve zâhir oldukdan sonra mezbûre Âişe meclis-i şer‘-i şerîf-i lâzımü’t-teşrîfde müteveffât-ı mezbûrenin terekesine vâzı‘u’l-yed olan işbu bâ‘isü’l-kitâb mezbûr Mustafa mahzarında ikrâr ve takrîr-i kelâm edip mûrisem müteveffât-ı mezbûrenin zevci mezbûr Mustafa zimmetinde mütekarrir ve ma‘kūdün-aleyh olan beş bin akçe mehr-i müeccelinden ve sâir esâs-ı beyt ve evânî-i nühâsiye ve gayr-ı nühâsiye terekesinden [5a] bi’l-irsi’ş-şer‘î bana isâbet eden elli esedî guruş kıymetli muhallefâtını mezbûr Mustafa yedinden tamamen ahz ü kabz eyleyip müteveffât-ı mezbûrenin terekesine müte‘allika cemî‘ de‘âvî ve mutâlebâtdan her birimiz âharın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-işrîn min-Şevvâ[l]i’l-mükerrem li-sene tis‘în ve elf. Şuhûdü’l-hâl: Receb b. Ahmed, Ali b. Musa, el-Hâc Yusuf b. Şa‘ban, İvaz b. Mehmed, Muslı Beşe b. Hüseyin, Ali b. Mehmed, İvaz b. Yahya, Ali b. Selim, Receb b. Abdullah.