Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 63 Hüküm no: 16 Orijinal metin no: [5a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Efendi b. Şücaeddin’in bir değirmende sahip olduğu altı sehim hissesini Sinan Bey b. Abdi Çelebi’ye sattığı Vilâyet-i Anadolu’da Hamid Sancağı’nda Yalvaç kazâsına tâbi‘ Kemân nâm karye ahâlîsinden fahrü’l-kuzât Ahmed Efendi b. Şücâeddin nâm kimesne meclis-i şer‘-i hatîr-i lâzımü’t-tevkīrde bâ‘isü’l-kitâb Sinan Bey b. Abdi Çelebi nâm kimesne mahzarında ikrâr ve takrîr-i kelâm edip karye-i mezbûre sınırı dâhilinde Çokrayık nâm mevzi‘de vâki‘ bir tarafdan Ahmed Çelebi tarlası ve bir tarafdan cebel ve bir tarafdan Parmaksız Değirmeni ve bir tarafdan çay ile mahdûd olup Kemân Suyu demekle ma‘rûf su üzerinde mevzû‘ olan değirmenin on iki sehimden altı sehim hisse-i şer‘iyemi târih-i kitâbdan altı ay mukaddem on keyl buğday ile dört esedî guruş ivaz mukābelesinde mezbûr Sinan Bey’e hîbe ve teslîm etmişidim hâlâ hîbe-i mezkûremden rücû‘ edip zikrolunan değirmenin on iki sehimden altı sehim nısf hisse-i şâyi‘amı mezbûr Sinan Bey’e kırk esedî guruşa bey‘ ve temlîk ol dahi iştirâ ve temellük ve kabûl eylediğinden sonra semeni olan meblağ-ı mezbûr kırk esedî guruşu mezbûr Sinan Bey’e hîbe-i sahîha-i şer‘iye ile hîbe ve teslîm ol dahi ittihâb ve kabûl ve tesellüm eylediğinden sonra zikrolunan değirmenin nısf hisse-i şâyi‘amı mahâllinde zabt ve tasarrufa mezbûr Sinan Bey’i taslît eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-hâmis ve’l-işrîn min-Şevvali’l-mükerrem li-sene tis‘în ve elf. Şuhûdü’l-hâl: Hüseyin Efendi b. İbrahim Halîfe, Hâfız Mehmed Efendi b. İbrahim Çelebi, Hüseyin Efendi b. Yakub, Şeyh Mehmed Efendi b. Ahmed Efendi, Ali b. Arslan.