Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 63 Hüküm no: 17 Orijinal metin no: [5a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mehmed Ağa b. Hüsrev’in muhallefatından bir evin iki zevcesi tarafından satıldığı Husûs-ı âti’t-takrîrin mahâllinde tahrîri iltimâs olunmağın savb-ı şer‘den ba‘s olunan Mevlânâ Abdullah Efendi b. Mehmed mahmiye-i İstanbul’da Davudpaşa Mahallesi’nde bi’l-fi‘il Beytü’l-mâli’l-hâs emîni Ömer Ağa b. Osman’ın sâkin olduğu menzile varıp zeyl-i kitâbda isimleri terkīm olunan Müslimîn huzûrlarında akd-i meclis-i şer‘-i hatîr etdikde mahmiye-i mezbûrede Koruk Mahmud Mahallesi’nde sâkin iken bundan akdem vefât eden Mehmed Ağa b. Hüsrev’in zâhirde zevce-i menkûha-i metrûkeleri Râbia bt. Hassâf ve Gülbûy bt. Abdullah’dan gayrı vâris-i ma‘rûfu olmamak ile muhallefâtının rub‘u mezbûrelere ve selâse-i erbâ‘ı cânib-i mîrîye âid olduğu şer‘an zâhir ve mütehakkık oldukdan sonra mezbûr Ömer Ağa asâleten ve merkūme Râbia’nın zâtı Hüseyin Çelebi b. Hasan ve Mustafa Çelebi b. Hüseyin ta‘rîfleriyle mu‘arrefe oldukdan sonra tarafından husûs-ı âti’z-zikri ikrâra ve menzil-i mezbûrun semeninden nısf ve rub‘ hissesini kabza vekîl olup mezbûrlar şehâdetleri ile şer‘an sâbit olan Abdülbaki Çelebi b. Ali vekâleten ve mezbûre Gülbûy zâtı Ömer b. Abdullah ve Mehmed b. Süleyman ta‘rîfleri ile mu‘arrefe oldukdan sonra tarafından kezâlik husûs-ı câ’i’z-zikri ikrâra ve semen-i menzil-i mezbûrdan nısf ve rub‘ hissesini kabza vekîl olup mezbûrlar şehâdetleri ile şer‘an sâbit olan Mehmed Çelebi b. Mahmud vekâleten meclis-i ma‘kūd-ı mezbûrda umdetü’l-emâcid ve’l-ekârim câmi‘ü’l-mehâmid ve’l-mekârim Siyavuş Ağa hazretlerinin hazînedârlığı hizmeti ile şeref-yâb olan hâfızü’l-kitâb fahrü’l-akrân İbrahim Ağa b. Mehmed mahzarında her biri ikrâr-ı tâm ve ta‘bîr ani’l-merâm edip müteveffâ-yı mezbûrun muhallefâtından olup mezbûr Koruk Mahm[u]d Mahallesi’nde vâki‘ bir tarafdan İsmail Çelebi b. Mehmed mülküne ve bir tarafdan ba‘zan Fazlı Çelebi b. Ömer Efendi mülküne ve ba‘zan Ahmed Çavuş mülküne ve ba‘zan Mustafa Çelebi b. Ahmed mülküne ve ba‘zan Mehmed Çelebi b. Abdullah mülküne ve bir tarafdan tarîk-ı âmma müntehî dâhiliyede üç bâb fevkānî ve bir bâb tahtânî odaları ve bir sofa ve bir matbah ve bir hamam ve bi’r-i mâyı ve kenîfi [ve] cüneyneyi ve hâriciyede iki bâb fevkānî ve bir bâb tahtânî odaları ve bir ahır ve bi’r-i mâyı ve kenîfi müştemil mülk menzil sûk-ı sultânîde kirâren ve mirâren müzâyede olunup rağabât-ı nâs bi’l-külliye munkatı‘a olduktan sonra menzil-i mezbûr merkūm İbrahim Ağa üzerinde seksen bin akçede karâr edip ziyâde ile tâlib-i âhar zuhûr etmediğinden mâ‘adâ meblağ-ı mezbûr [5b] yevm-i akidde menzil-i mahdûd-ı mezbûrun semen-i misli olduğu dahi sikāt ihbârı ile mütehakkık oldukdan sonra menzil-i mahdûd-ı mezbûrun merkūm İbrahim Ağa’ya tarafeynden îcâb ve kabûlü hâviye şurût-ı müfsideden ârî bey‘-ı bâtt-ı sahîh-i şer‘î ile bey‘ ve teslîm ol dahi iştirâ ve tesellüm eylediğinden sonra semeni olan meblağ-ı mezbûr seksen bin akçeyi mezbûr İbrahim Ağa yedinden bi-kadri’l-hısas ahz ü kabz eyledik ba‘de’l-yevm menzil-i mahdûd-ı mezbûr merkūm İbrahim Ağa’nın mülk-i müşterâsıdır keyfe mâ yeşâ’ ve yahtâr mutasarrıf olsun dediklerinde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Mehmed b. Hasan ile meclis-i şer‘a gelip alâ-vukū‘ihî inhâ ve takrîr etmeğin mâ-hüve’l-vâki‘ bi’t-taleb ketb ve tahrîr olundu. Fi’l-yevmi’r-râbi‘ ve’l-işrîn min-Şevvali’l-mükerrem li-sene tis‘în ve elf. Şuhûdü’l-hâl: Fahrü’l-eimme Yakub Efendi b. Şa‘ban, Ömer Ağa b. Mehmed, Abdüllatif Çelebi b. Yakub, Mehmed Bey b. Ebûbekir, Süleyman b. Abdullah, el-Hâc Hasan b. Abdullah, Mehmed Çelebi b. Mehmed, Mehmed Ağa b. Muharrem, Mehmed b. Süleyman, Ali Çelebi el-münâdî, Mustafa Çelebi b. Ali, Ebûbekir Efendi b. Mahmud, el-Hâc Yusuf b. Abdullah, İbrahim b. Nasuh, Mahmud Beşe Çukadâr-ı Siyavuş Ağa.