Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 65 Hüküm no: 18 Orijinal metin no: [5b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rumeli Kazaskeri Hamid Efendi’nin Ali Ağa b. Üveys’ten alacağını tahsil ettiğinden rehin tuttuğu eşyaları teslim ettiği Hâlâ Sadr-ı Rum olan a‘lemü’l-ulemâ’i’l-mütebahhirîn bedru’l-fudalâi’l-müteşerri‘în yenbû‘u’l-fezâil ve’l-meâli metbû‘i’l-efâzıl ve’l-e‘âlî alemü’l-ilm ve’l-hüdâ menârü’l-fazl ve’t-tekā sa‘âdetli Hâmid Efendi hazretleri meclis-i şer‘-i hatîr-i lâzımü’t-tevkīrde sâbıkā Kanlıca kal‘ası ağası olup hâlâ medîne-i Hazret-i Ebâ Eyyûb-ı Ensârî’de Bıçakçı Ferhad Mahallesi’nde sâkin bâ‘isü hâze’l-kitâb Ali Ağa b. Üveys mahzarında ikrâr ve takrîr-i kelâm edip bundan akdem merkūm Ali Ağa zimmetinde cihet-i karz-ı şer‘îden bin altı yüz esedî guruş hakkım olup mezbûr Ali Ağa meblağ-ı mezbûr mukābelesinde eşyâ-i memlûkesinden iki elmas altın yüzük ve yüz otuz iki elmaslı misâli bir altın hançer ve her biri on altışar elmaslı iki altın çeprâst ve hurde elmaslı bir altın düğmesini bana rehin vaz‘ ve teslîm ben-dahi irtihân ve tesellüm etmişidim. Hâlâ meblağ-ı mezbûr bin altı yüz guruşun bin üç yüz guruşunu merkūm Ali Ağa yedinden alıp kabz edip rihân-ı mezbûremi bi’l-cümle işbu meclis-i şer‘de mezbûr Ali Ağa’ya def‘ ve teslîm ol dahi ahz ü kabz ve tesellüm eylediğinden sonra meblağ-ı bâkī üç yüz guruşa müte‘allika âmme-i de‘âvî ve mutâlebâtdan ben mezbûr Ali Ağa’nın zimmetini ibrâ-i âm ile ibrâ edip mezbûr Ali dahi husûs-ı mezbûra ve târih-i kitâba gelince beynimizde cârî olan ahz ü i‘tâ ve mu‘âmelât-ı şettâya müte‘allika hukūk-ı ma‘lûme ve mechûle da‘vâsından benim zimmetimi ibrâ ve ıskāt eyledi dedikde mezbûr Ali Ağa müşârün-ileyh hazretlerini cemî‘ kelimâtında tasdîk ve tahkīk etmeğin mâ-vaka‘a bi’t-taleb ketb olundu. Fi’l-yevmi’s-sâdis ve’l-işrîn min-Şevvali’l-mükerrem li-sene tis‘în ve elf. Şuhûdü’l-hâl: Umdetü’l-müderrisîn Tezkireci Abdurrahim Efendi, fahrü’l-müderrisîni’l-kirâm Ahmed Efendi, fahrü’l-kuzât el-Hâc Ahmed Efendi, fahrü’l-kuzât Hasan Efendi el-Kādî bi-Kazâ-i Havâss-ı Prizren, Mehmed Efendi b. Receb es-sâkin bi-Mahalleti Neslişah Sultân, Mahmud Beşe b. ( ) el-Mübâşir, Mehmed Bey el-Yesârî, el-Hâc Mustafa Çukadâr, Kâtibü’l-hurûf Abdülfettah Efendi.