Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 65 Hüküm no: 19 Orijinal metin no: [5b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva bt. Abdullah ile kocası İbrahim Çelebi b. Mahmud’un muhâlaa yoluyla boşandıkları Mahmiye-i İstanbul’da Muhtesib İskender Mahallesi’nde sâkine Havva bt. Abdullah nâm hatun meclis-i şer‘-i hatîrde zevci işbu bâ‘isü’l-kitâb İbrahim Çelebi b. Mahmud nâm kimesne mahzarında ikrâr ve takrîr-i kelâm edip zevcim mezbûr İbrahim Çelebi zimmetinde mütekarrir ve ma‘kūdün-aleyh olan bin akçe mehr-i müeccelimden ve nafaka-i iddet-i mu‘ayyenemden geçip meûnet-i süknâm dahi kendi üzerime olmak üzre zevcim mezbûr ile muhâla‘a-i sahîha-i şer‘iye ile muhâla‘a eylediğimde ol dahi hul‘-ı mezbûru kabûl eyleyip hukūk-ı zevciyete müte‘allika cemî‘ da‘vâdan ve zevciyet beynimizde kāime iken ahz ve bey‘ ve semenini istihlâk eylediği bir sîm kuşak kıymeti olan sekiz yüz akçe da‘vâsından her birimiz âharın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledik dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâdis ve’l-işrîn min-Şevvali’l-mükerrem li-sene tis‘în ve elf. Şuhûdü’l-hâl: Ahmed Ağa b. Hasan, Mehmed Bey b. Hamza, Mehmed b. Osman, Hasan b. Mehmed, Abdülfettah Çelebi b. Himmet, Hüseyin Efendi b. Hasan, Mehmed Çelebi b. Haydar