Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 66 Hüküm no: 20 Orijinal metin no: [6a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mescidizâde Osman Efendi’nin cariyesi Ferruh bt. Abdülvehhab’ı azat ettiği Mahmiye-i İstanbul’da Efdalzâde Mahallesi sükkânından olup Mukābele-i Süvâri halîfelerinden umdetü erbâbü’t-tahrîr ve’l-kalem Mescidîzâde Osman Efendi tarafından husûs-ı âti’l-beyâna vekîl olduğu Mehmed Çelebi b. Mehmed ve Mahmud Bey b. Hasan nâm kimesneler şehâdetleri [ile] şer‘an sâbit olan Mehmed Bey b. Mustafa nâm kimesne meclis-i şer‘-i hatîr-i lâzımü’t-tevkīrde bi’l-vekâle takrîr-i kelâm edip müvekkilim mûmâ-ileyh Osman Efendi kendüye rıkkıyetini mu‘terife olan orta boylu açık kaşlı sarı elâ gözlü Rusiyyetü’l-asl bâ‘isetü’l-kitâb Ferruh bt. Abdülvahhab nâm câriyesini cemî‘ mâlından âzad ve mülkünden ihrâc ve sâir harâir-i asliyât zümresine ilhâk ve idrâc eyledi ba‘de’l-yevm mevsûfe-i mezbûre Ferruh sâir harâir-i asliyât gibi hürre olup üzerinde velâ-i şer‘îden gayrı müvekkilim mûmâ-ileyh Osman Efendi’nin hakkı kalmadı dedikde mâ-hüve’l-vâki‘ bi’t-taleb ketb olundu. Fi’l-yevmi’s-sâmin ve’l-işrîn min-Şevvali’l-mükerrem li-sene tis‘în ve elf. Şuhûdü’l-hâl: Mehmed Efendi b. Ömer el-imâm, İbrahim Çelebi b. ( ), Kaytas Bey b. Abdullah, İbrahim Bey b. Ahmed, Mehmed Bey b. Ahmed, Mehmed Çelebi b. Haydar, Ahmed Çelebi b. Piyale