Bab Mahkemesi 54 Numaralı Sicil (H. 1102 / M. 1691) cilt: 20, sayfa: 315 Hüküm no: 377 Orijinal metin no: [64b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe Hatun’un vakfettiği evin tamiri için yapılan masrafların keşfi Husûs-ı âti’z-zikrin mahallinde keşf ve tahrîri için fermân-ı âlî sâdır olmağın, imtisâlen-lehû me’zûnen savb-ı şer‘den irsâl olunan İbrahim Efendi b. Mehmed el-Hamîdî hâssa mi‘mârlardan Mustafa Halîfe b. Dede Mehmed ve Ali Halîfe b. Abdullah ile mahmiye-i İstanbul’da Seydî Ömer mahallesinde vâki‘ Şaban Efendi b. Hasan’ın menziline varıp, zeyl-i vesîkada muharrerü’l-esâmi müslimîn huzûrlarında akd-i meclis-i şer‘-i nebevî eyledikde, mezbûr Şaban Efendi meclis-i ma‘kūd-ı mezbûrda ber vech-i âtî vakıf menzile mütevellî olan eş-Şeyh Mustafa Efendi mahzarında takrîr-i kelâm ve bast-ı merâm edip, merhûme Ayşe Hâtun nâm sâhibü’l-hayrın rûhu için külle yevm üç İhlâs-ı şerîf tilâveti için süknâsı sulehâya vakf ve şart eylediği işbu bir tarafdan Hüseyin Efendi mülkü ve bir tarafdan Serâsercibaşı Abdullah Ağa mülkü ve bir tarafdan Esirci Mustafa Beşe mülkü ve bir tarafdan tarîk-i âm ile mahdûd büyût-ı adîdeyi müştemil menzil, ber vech-i muharrer tevcîh-i hâkimü’ş-şer‘le bana tevcîh olunup, lâkin menzil-i mezbûr mürûr-ı eyyâm ile müşrif-i harâb olmağla, bundan akdem mütevellî-i mezbûrun izin ve ma‘rifetiyle menzil-i mezbûrda işbu tahtânî oda ve kenîf ve sofa ve duvar üzerinde vâki‘ tahta perde ve sâir mevâzi‘-i müte‘addideyi mâlımla mülküm olmak üzre nefsimçün binâ etmekle, hâlâ masrûfum mütevellî-i mezbûrun muvâcehesinde keşf ve tahmîn-i sahîh ile tahmîn ve takvîm olunmak matlûbumdur dedikde, gıbbe’t-tasdîki’ş-şer‘î kaziyye minvâl-i muharrer üzre olduğu ba‘de’l-mu‘âyene ve’l-müşâhede mi‘mârân-ı mezbûrân mârru’z-zikr tahtânî odanın müceddeden çam tahtasından tavanını mesâha ettiklerinde, tûlen sekiz zirâ‘ arzan altı zirâ‘ bi hesâb-ı terbî‘î kırk sekiz zirâ‘ olup, zirâ‘ı yirmişer akçeden bin iki yüz akçe ve yine bi hesâb-ı mezbûr kırk sekiz zirâ‘ tahta döşemenin zirâ‘ı otuzar akçeden bin dört yüz kırk akçe ve bir mükemmel musandıra ma‘a dolap beş yüz akçe ve on iki zirâ‘ tahta perde iki yüz kırk akçe ve üç aded sırça çam duvar üç yüz akçe ve yine bi hesâb-ı mezbûr elli dört zirâ‘ taşı atîk taşı duvarın zirâ‘ı yirmi beşer akçeden bin üç yüz elli akçe ve üç aded raf tahtası doksan akçe ve yine bi hesâb-ı mezbûr kırk zirâ‘ ve yine duvarın zirâ‘ı otuz akçeden bin iki yüz akçe ve yine bi hesâb-ı mezbûr duvar üzerinde vâki‘ elli bir zirâ‘ zirâ‘ı yirmişer akçeden bin yirmi akçe ve yine kenîfi müceddeden yirmi dört zirâ‘ taşı kuyunun zirâ‘ı ellişer akçeden bin iki yüz akçe ve yine kenîfde yedi aded künk yetmişer akçe ve yine fevkānî sofa ve kenîfde yetmiş bir zirâ‘ kapağın yüz seksen akçe ve yine sofada mahlût tahta döşeme otuz iki zirâ‘ olmağla yedi yüz akçe ve yine nîm şişeli altı zirâ‘ kafesi yüz seksen akçe ve yine bi hesâb-ı mezbûr yirmi altı zirâ‘ yağmurluk için tahta perde üç yüz doksan akçe ve yine bi hesâb-ı mezbûr tahta kaplama perde yirmi iki zirâ‘ olmağla zirâ‘ı yirmişer akçeden dört yüz kırk akçe ve sâir mevâzi‘-i müte‘addide meremmât-ı lâzıme dört yüz akçe min haysü’l-mecmû‘ on üç bin iki yüz seksen akçeye bâliğ olup, meblağ-ı mezbûrdan noksana ebniye-i mezbûre vücûda gelmek mümkün değildir deyu mi‘mârân-ı mezbûrân ile sâir ebniye ve sukūf ahvâline ıttılâ‘-ı tâm ı olan bî-garaz müslimîn icmâ‘ ve ittifâk ettiklerinden sonra vâki‘ hâlî mevlânâ-yı mezbûr mahallinde ketb ve tahrîr, ba‘dehû ma‘an irsâl olunan İsmail b. Mustafa ve Mehmed b. Mustafa ile meclis-i şer‘a gelip [65a] alâ vukū‘ihî inhâ ve takrîr etmeğin, mâ hüve’l-vâki‘ bi’t-taleb ketb olundu. Fi’l-yevmi’s-sâdis aşer min Cumâdelâhire sene 1102. Şuhûdü’l-hâl: El-Hâc Veli Çelebi b. Süleyman, Kayyum Ahmed Halîfe b. Mehmed, Mustafa Çelebi b. Süleyman, Hasan Bey b. Ramazan, Hüseyin Ağa b. Abdullah, Mehmed Efendi b. Mehmed el-imâm, Mustafa Ağa b. Hüseyin, Mehmed Ağa b. Mustafa, Receb Çelebi b. İbrahim.