Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 71 Hüküm no: 27 Orijinal metin no: [7b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gevherhan Sultan’ın başağası Beşir Ağa’nın Nikola ve Marko adlı esnaflara olan borcunu ikrar ettiği Sultânü’l-muhadderât tâcü’l-mestûrât zâtü’l-ulâ ve’s-sa‘âdât devletlü Gevherhan Sultân hazretlerinin sâbıkā başağası olan fahrü’l-emâsil ve’l-akrân Beşir Ağa b. Abdülmennan meclis-i şer‘-i hatîrde bakkāl tâifesinden Nikola v. Yani ve tavukçu tâifesinden Marko nâm zimmîler muvâcehelerinde ikrâr ve takrîr-i kelâm edip bundan akdem mezbûr Nikola sultân-ı müşârün-ileyhânın matbahına doksan bin akçe kıymetli bakkāl emti‘ası verip ve merkūm Marko kezâlik altmış sekiz bin sekiz yüz akçe kıymetli tavuk ve güvercin verdiğinden sonra mezbûrân Nikola ve Marko mukaddemâ her birimiz zikrolunan emti‘amızı sultân-ı müşârün-ileyhânın matbahına senin emrinle vermişidik deyü meblağayn-ı mezbûreyni cem‘an yüz elli sekiz bin sekiz yüz akçeyi benden da‘vâ ve taleb eylediklerinde beynimizde münâza‘ât-ı kesîre vukū‘undan sonra el-hâletü hâzihî meblağ-ı mezbûrun seksen bin akçesi vekîlharc İbrahim Bey üzerinde zuhûr edip şer‘an meblağ-ı mezbûr seksen bin akçeyi ben mezbûr İbrahim Bey’den ahz etmeğin bâkī mezbûrân Nikola ve Marko’ya kendi mâlımdan yetmiş sekiz bin sekiz yüz akçe verilmek lâzım gelmeğin mezbûrân dahi meblağ-ı mezbûr yüz elli sekiz bin sekiz yüz akçeyi târih-i kitâbdan yirmi gün tamamına değin tecîl eylediklerinde ben-dahi tecîl-i mezbûru kabûl eyledim elân meblağ-ı müeccel-i mezbûr yüz elli sekiz bin sekiz yüz akçe mezbûrâna lâzımü’l-edâ deynimdir dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin ve’l-işrîn min-Şevvali’l-mükerrem li-sene tis‘în ve elf. Şuhûdü’l-hâl: el-Hâc Halil b. Hasan, Mustafa Çavuş b. ( ) el-Mübâşir, Süleyman b. Mehmed, Kasab Ali Beşe b. Abdullah.