Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 72 Hüküm no: 28 Orijinal metin no: [7b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gevherhan Sultan’ın başağası Beşir Ağa’nın kasap Ali Beşe b. Abdullah’a olan borcunu ikrar ettiği Sultânü’l-muhadderât tâcü’l-mestûrât zâtü’l-ulâ ve’s-sa‘âdât devletlü Gevherhan Sultân hazretlerinin sâbıkā başağası olan fahrü’l-emâsil ve’l-akrân Beşir Ağa b. Abdülmennan meclis-i şer‘-i şerîfde kasab tâifesinden Ali Beşe b. Abdullah nâm kimesne mahzarında ikrâr ve takrîr-i kelâm edip bundan akdem mezbûr Ali Beşe sultân-ı müşârün-ileyhânın matbahına altmış bin dokuz yüz akçe kıymetli lahm verip yirmi dört bin akçesini mukaddemâ mezbûr Ali Beşe ahz ü kabz eyleyip bâkī kırk bir bin dokuz yüz akçesini zikrolunan lahmı senin emrinle vermişidim deyü benden taleb ve da‘vâ eyledikde ben-dahi cevâbında meblağ-ı bâkī-i mezbûru dahi vekîlharc İbrahim Bey yedinden ahz ü kabz etmişidin deyü def‘le mukābele edip lâkin def‘-i mezbûrumu isbâta kādir olmayıp mezbûr Ali Beşe’ye yemîn verildikden sonra el-hâletü hâzihî meblağ-ı bâkī-i mezbûr kırk bir bin dokuz yüz akçeyi târih-i kitâbdan yirmi gün tamamına dek tecîl eyledikde ben-dahi tecîl-i mezbûru kabûl eyledim elân meblağ-ı bâkī-i müeccel-i mezbûr kırk bir bin dokuz yüz akçe lâzımü’l-edâ deynimdir dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâmin ve’l-işrîn min-Şevvali’l-mükerrem li-sene tis‘în ve elf. Şuhûdü’l-hâl: el-Hâc Halil b. el-Hâc Hasan, Mustafa Çavuş b. ( ) el-Mübâşir, Süleyman Efendi b. Mehmed, Kasab Ali Beşe b. Abdullah.