Bab Mahkemesi 54 Numaralı Sicil (H. 1102 / M. 1691) cilt: 20, sayfa: 316 Hüküm no: 378 Orijinal metin no: [65a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şaban b. Hasan b. Bedreddin tasarrufundaki Hafsa Hatun Vakfı’na ait evin tamiri Husûs-ı âti’z-zikrin mahallinde keşf ve tahrîri için fermân sâdır olmağın, imtisâlen-leh taraf-ı şer‘den me’zûnen irsâl olunan İbrahim Efendi b. Mehmed el-Hamîdî hâssa mi‘mârlardan Dede Mehmed Halîfe b. Abdullah ve diğer Mehmed Halîfe b. Abdullah ile mahmiye-i İstanbul’da Suhte Sinan mahallesinde sâkin iken bundan akdem vefât eden Şaban b. Hasan b. Bedreddin’in menziline varıp, zeyl-i kitâbda muharrerü’l-esâmi müslimîn huzûrunda akd-i meclis-i şer‘-i nebevî eyledikde, müteveffâ-yı mezbûrun veresesi zevce-i metrûkesi Râbia bt. Receb nâm hâtun ile sulbî oğlunun oğlu Mustafa’ya münhasıra olduğu şer‘an zâhir ve mütehakkik oldukdan sonra mezbûrân Râbia ve Mehmed meclis-i ma‘kūd-ı mezbûrda merhûme Hafsa Hâtun Vakfı’nda mütevellî olan Osman Efendi b. eş-Şeyh İsâ mahzarında her biri ikrâr ve takrîr-i kelâm edip, gallesi mahalle-i mezbûr imâmı olanlara vâkıfe-i mezbûrenin vakfı olup mahalle-i mezbûrda vâki‘ iş bu iki tarafdan Nüzül Emîni Süleyman Ağa’nın tasarrufunda olan menzil ve bir tarafdan ba‘zan küttâbdan Mustafa Halîfe ve ba‘zan bizim tasarrufumuzda olan menzil ve bir tarafdan tarîk-i âm ile mahdûd büyût-ı adîdeyi müştemil vakıf menzil, mûrisimiz müteveffâ-yı mezbûrun hayâtında icâre-i mu‘accele ve yevmî bir akçe ücret müeccele ile taht-ı tasarrufunda olup, lâkin menzil-i mezbûr mürûr-ı eyyâm ile müşrif-i harâb olmağla müteveffâ-yı mezbûr vakf-ı mezbûr mütevellîsi izin ve ma‘rifetiyle icâre-i mu‘accelesine mahsûb olmak üzre kendi mâlıyla menzil-i mezbûrda işbu iki bâb fevkānî oda ve dehliz ve bir bâb tahtânî oda ve kenîf binâ ve ihdâs ve ancak sekenesine mutasarrıf olmağla masrûfunu kable’l-istîfâ bilâ-veled fevt olmağla, menzil-i mezbûr taraf-ı vakfa âid olmağın menzil-i mezbûrun ebniye-i müşâhede-i mezkûresini ba‘de’l-isbât mi‘mârân-ı mezbûrân keşf ve mesâha ve tahmîn ettiklerinde, tûlen dokuz zirâ‘ kadden beş zirâ‘ bi hesâb-ı terbî‘î kırk beş zirâ‘ taş duvarın ve zirâ‘ı altmış akçeden iki bin yedi yüz akçe ve yine bi hesâb-ı mezbûr yüz on zirâ‘ dolma duvarın zirâ‘ı otuz akçeden üç bin üç yüz akçe ve iki aded çıkrıkçı işi pencere yüz altmış akçe ve bir sâde kapı seksen akçe ve on zirâ‘ köhne döşeme yüz elli akçe ve yine on zirâ‘ köhne tavan yüz elli akçe ve bir nerdübân üç yüz akçe ve bir tunc direği yüz elli akçe ve ber vech-i tahmîn bir köhne kenîf iki yüz akçe ve yine fevkānî iki bâb odada seksen zirâ‘ sakfın zirâ‘ı otuz akçeden iki bin dört yüz akçe ve bi hesâb-ı mezbûr sukūfu boyalı seksen zirâ‘ tavanın zirâ‘ı yirmi beş akçeden iki bin akçe ve yine seksen zirâ‘ tahta döşeme iki bin akçe ve yine yüz altmış zirâ‘ dolma duvarın zirâ‘ı otuz akçeden dört bin sekiz yüz akçe ve iki kemerli sâde kapı üç yüz akçe ve iki aded musandıra sekiz yüz akçe dört aded pencere ma‘a kanat altı yüz akçe ve on beş zirâ‘ arak tahtası üç yüz akçe ve altı aded cam duvar billur üç yüz altmış akçe ve iki aded mükemmel ocak altı yüz akçe ve yine kepenk üzerine üç zirâ‘ tahta döşeme kırk beş akçe ve sekiz zirâ‘ kirpiden saçak iki yüz kırk akçe ki min haysü’l-mecmû‘ yirmi bir bin altı yüz otuz beş akçeye bâliğ olup, meblağ-ı mezbûrdan ba‘de’t-tahmîn altı bin akçesi nakzı için ihrâc olundukdan sonra ehl-i vukūfdan zeyl-i vesîkada muharrerü’l-esâmi müslimîn ihbârlarıyla sekiz senede menzil-i mezbûrun ecr-i misli yevmî beş akçeden on dört bin dört yüz akçeye bâliğ olup, yevmî birer akçe müeccelesi sekiz senede taraf-ı vakfa edâ olunmakla sekiz senede yevmî dörder akçeden on bir bin beş yüz yirmi akçesi istîfâ olunduğu şer‘an zâhir ve mütebeyyin oldukdan sonra istîfâ olunmayan dört bin yüz on beş akçeyi taraf-ı vakıfdan bize edâya mütevellî-i mezbûra ba‘de’t-tenbîh, mütevellî merkūm dahi ber vech-i mezbûr istîfâ olunmayan meblağ-ı mezbûr dört bin yüz on beş akçeyi bi’t-tamâm bize def‘ ve teslîm, biz dahi ahz u kabz edip menzil-i mezbûrda alâka ve medhalimiz kalmamışdır dediklerinde, gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde keşf ve tahrîr, ba‘dehû ma‘an irsâl olunan İsmail b. Mustafa ve Hüseyin b. Halil ile meclis-i şer‘a gelip alâ vukū‘ihî inhâ ve takrîr etmeğin, mâ hüve’l-vâki‘ bi’t-taleb ketb olundu. Fi’l-yevmi’s-sânî min Cumâdelâhire li sene isneteyn ve mi’e ve elf. Şuhûdü’l-hâl: Abdullah Çelebi b. Ahmed, el-Hâc Hüseyin b. Ömer, Mehmed Ağa b. el-Hâc Ahmed, Mehmed Çelebi b. Receb, Arpacı Ahmed b. Mehmed, Mehmed b. Receb, Sefer b. Şaban, Müezzin Mustafa Çelebi b. Osman, İbrahim Çelebi b. el-Hâc Mehmed.