Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 75 Hüküm no: 30 Orijinal metin no: [8a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ebussuûdzâde Ahmed Efendi’nin Yusuf Efendi b. Hüseyin üzerine açtığı ziyade alacak davasının reddedildiği Mahmiye-i İstanbul’da Kirmasti Mahallesi’nde sâkin fahrü’l-müderrisîni’l-kirâm Ebussuûdzâde Ahmed Efendi meclis-i şer‘-i şerîf-i lâzımü’t-teşrîfde fahrü’l-akrân bâ‘isü hâze’l-kitâb Yusuf Efendi b. Hüseyin tarafından husûs-ı âtîye vekîl olduğu Ahmed Efendi b. Receb ve el-Hâc Ali b. Mustafa nâm kimesneler şehâdetleri ile şer‘an sâbit olan li-ebeveyn karındaşı Hasan Ağa mahzarında üzerine da‘vâ ve takrîr-i kelâ[m] edip müvekkil-i merkūm Yusuf Efendi’ye târih-i kitâbdan üç sene mukaddem yâkutlu ve necefli altından masnû‘ iki paftalı kuşağımı bin dört yüz yetmiş beş esedî guruşa bey‘ ve teslîm ol dahi iştirâ ve tesellüm ve kabûl ettikten sonra semeni olan meblağ-ı mezbûr bin dört yüz yetmiş beş esedî guruşun bin iki yüz yirmi beş guruşunu târih-i mezbûrda müvekkil-i mezbûrdan ahz ü kabz edip iki yüz elli esedî guruşum zimmetinde kalmağla hâlâ meblağ-ı bâkī-i mezbûr iki yüz elli esedî guruşu müvekkil-i merkūm Yusuf Efendi’den da‘vâ ve taleb eylediğimde bana edâ ve teslîmden imtinâ‘ eder suâl olunup meblağ-ı bâkī-i mezbûru merkūm Yusuf Efendi bana edâ ve teslîm etmek üzre vekîl-i mezbûr Hasan Ağa’ya tenbîh olunması matlûbumdur dedikde gıbbe’s-suâl vekîl-i mezbûr Hasan Ağa cevâbında müvekkilim merkūm Yusuf Efendi târih-i mezbûrda zikrolunan kuşağımı müşârün-ileyh Ahmed Efendi’den ancak kabzını i‘tirâf eylediği meblağ-ı mezbûr bin [8b] iki yüz yirmi beş esedî guruşa iştirâ edip ziyâdeye iştirâ eylediğini inkâr edicek müşârün-ileyh Ahmed Efendi’den müdde‘âsını mübeyyine beyyine taleb olundukda ityân-ı beyyine için izhâr-ı acz edip istihlâf etmeğin müvekkil-i merkūm Yusuf Efendi müsinn ve ihtiyâr olup meclis-i şer‘a huzûru müte‘azzir olmağın tahlîf için küttâb-ı mahkemeden Mevlânâ Hasan b. Hüseyin irsâl olup ol dahi merkūm Yusuf Efendi’nin mahmiye-i mezbûrede Mi‘mâr Sinan Mahallesi’nde sâkin olduğu menzile varıp ber-vech-i muharrer zikrolunan kuşağı müşârün-ileyh Ahmed Efendi’den bin iki yüz yirmi beş esedî guruştan ziyâdeye iştirâ etmediğini mevlânâ-yı mezbûr mahâllinde tahrîr ba‘dehû ma‘an irsâl olunan Mehmed Çelebi b. Haydar ile meclis-i şer‘a gelip alâ-vukū‘ihî inhâ ve takrîr ettikten sonra müşârün-ileyh Ahmed Efendi ziyâde da‘vâsı için bilâ-beyyine bî-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-işrîn min-Şevvali’l-mükerrem li-sene tis‘în ve elf. Şuhûdü’l-hâl: Fahru erbâbü’t-tahrîr ve’l-kalem Mehmed Efendi b. Mehmed, Ahmed Efendi b. Ali, Ahmed Bey b. ( ), el-Hâc Mustafa b. ( ), Mehmed Çelebi b. Cafer.