Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 76 Hüküm no: 31 Orijinal metin no: [8b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdülkerim b. Hüseyin’in ev, bağ, bahçe ve otuz dönüm tarlalarının nısf-ı şâyiini Mustafa Beşe b. Ebubekir’e sattığı Vilâyet-i Rumeli’nde Görice kazâsına tâbi‘ Orsenik nâm karye ahâlîsinden Abdülkerim b. Hüseyin nâm kimesne mahmiye-i İstanbul’da meclis-i şer‘-i hatîrde işbu bâ‘isü’l-kitâb Mustafa Beşe b. Ebîbekir mahzarında ikrâr-ı tâm ve takrîr-i kelâm edip babam mezbûr Hüseyin’den bi’l-irsi’ş-şer‘î bana intikāl edip karye-i mezbûre sınırı dâhilinde vâki‘ lede’l-ahâlî ve’l-cîrân ma‘lûmü’l-hudûd menzil ve bağ ve bahçenin nısf-ı şâyi‘ini mezbûr Mustafa Beşe’ye tarafeynden îcâb ve kabûlü hâvî bey‘-ı kat‘î ile iki bin akçeye bey‘ edip ve kezâlik otuz dönüm tarlaların dahi nısf-ı şâyi‘ini mezbûra iki bin akçe bedel mukābelesinde sahib-i arz ma‘rifetiyle ferâğ ve tefvîz ol dahi iştirâ ve kabûl eyledikden sonra semen-i merkūm ile bedel-i mezbûrdan müctemi‘ olan dört bin akçeyi mezbûr Mustafa Beşe yedinden tamamen ahz ü kabz eyleyip zikri mürûr eden bağ ve bahçe ve tarlaların ve menzilin nısf-ı şâyi‘lerini mahallerinde zabt ve tesellüm ve tasarrufa mezbûr Mustafa Beşe’yi taslît eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-işrîn min-Şevvali’l-mükerrem li-sene tis‘în ve elf. Şuhûdü’l-hâl: Osman Beşe b. Mustafa, Süleyman Beşe b. Hasan, İbrahim b. Kasım, Hüseyin b. Osman, Hasan b. İlyas, Mustafa b. Hasan.