Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 77 Hüküm no: 33 Orijinal metin no: [9a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Mehmed b. Ömer’in Bostan Bey b. Mustafa’ya evini basıp kıymetli mallarını aldığı iddiasıyla açtığı davanın reddedildiği Vilâyet-i Anadolu’da Trabzon Sancağı’nda Rize kasabası ahâlîsinden Hacı Mehmed b. Ömer nâm kimesne Dîvân-ı Hümâyûn-ı sa‘âdet-makrûnda ma‘kūd meclis-i şer‘-i şerîf-i lâzımü’t-teşrîfde kasaba-i mezbûre ahâlîsinden bâ‘isü’l-kitâb Bostan Bey b. Mustafa nâm kimesne mahzarında üzerine da‘vâ ve takrîr-i kelâm edip târih-i kitâbdan on sekiz ay mukaddem mezbûr Bostan Bey kasaba-i mezbûrede vâki‘ menzilimi vakt-i zuhrda basıp sandığım içinden bir altın zincir ve bir çift altın bilezik ve dört kumaş zenne kaftanı ve sekiz yüz altınımı ahz ü kabz ve mesârifine sarfla istihlâk etmişdir hâlâ mezbûr Bostan Bey’e suâl olunup ihkāk-ı hak olunmak matlûbumdur dedikde gıbbe’s-suâl ve akībe’l-inkâr müdde‘î-i mezbûr el-Hâc Mehmed’den müdde‘âsını mübeyyine beyyine taleb olundukda ityân-ı beyyine için nice def‘a mehl-i şer‘î taleb edip imhâl olundukdan sonra ityân-ı beyyineden izhâr-ı acz edip istihlâf etmeğin ber-vech-i muharrer müdde‘î-i mezbûrun târih-i mezbûrda kasaba-i mezbûrede vâki‘ menzilini basıp sandığı içinden bir altın zincir ve bir çift altın bilezik ve dört kumaş zenne kaftan ve sekiz yüz altınını ahz ü kabz etmeyip üzerine red ve damândan bir nesne lâzım olmadığına mezbûr Bostan Bey’e yemîn teklîf olundukda ol dahi alâ-vefki’l-mesûl yemîn billâhi’l-aliyyü’l-a‘lâ etmeğin mûcebince müdde‘î-i mezbûr el-Hâc Mehmed bilâ-beyyine bî-vech mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-işrîn min-Şevvali’l-mükerrem li-sene tis‘în ve elf. Şuhûdü’l-hâl: Osman Ağa b. Mehmed Ağa, Mehmed Bey b. Alaybaşı, Hüseyin Beşe b. ( ), Mahmud b. ( ), Mehmed Çelebi b. Osman, Ahmed Çelebi b. Piyale.