Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 78 Hüküm no: 35 Orijinal metin no: [9a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Şaban’ın iki göz su değirmeninin yarı hissesini Receb b. Kalender’e sattığı Fi’l-asl Vilâyet-i Anadolu’da Küretünnühâs kazâsında Mancılık nâm karye ahâlîsinden olup mahmiye-i İstanbul’da el-Hâc Muhyiddin Mahallesi’nde sâkin Mustafa b. Şa‘ban nâm kimesne meclis-i şer‘-i hatîrde işbu bâ‘isü’l-kitâb üveyi oğlu Receb b. Kalender mahzarında ikrâr ve takrîr-i kelâm edip karye-i mezbûre kurbünde Devrekâni Nehri üzerinde vâki‘ bir tarafı Frenkler ve bir tarafı Sabuncular ve bir tarafı salgam bicek ve bir tarafı tarîk-ı âmma müntehî bir sakf altında iki göz mülk değirmenimin nısf-ı şâyi‘in mezbûr Receb’e seksen esedî guruşa bey‘ edip mezbûr Receb dahi iştirâ eylediğinden sonra semeni olan meblağ-ı mezbûr seksen esedî guruşu mezbûr Receb’e emrim ile zevcem Emine nâm hatunun on iki sene nafakasına harc ve sarf eylediği seksen esedî guruşa takās ol dahi mukāssa ve kabûl edip mârrü’z-zikr iki göz su değirmeninin nısfını mahâllinde zabt ve tasarruf etmek üzre mezbûr Receb’i taslît eylediğimden sonra mezbûr Receb dahi ben kazâ-i nahb edinceye değin kendi mâlıyla teberru‘an beni infâk etmek üzre ta‘ahhüd eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-gurreti Zilka‘deti’ş-şerîfe li-sene tis‘în ve elf. Şuhûdü’l-hâl: Ali b. Mahmud, Mustafa b. Hüseyin, Muslı b. Süleyman, Ahmed Çelebi b. Piyale, Mehmed Çelebi b. Haydar.