Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 81 Hüküm no: 38 Orijinal metin no: [10a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Borçlarından dolayı hapiste olan yeniçeri Mehmed Beşe b. Mahmud’un salıverildiği Dergâh-ı âlî -dâme mahfûfen bi’l-meâli- yeniçerilerinin yetmiş yedinci cemâ‘ate mahsûs oda neferâtından mahmiye-i İstanbul’da Şeyh Vefa Mahallesi’nde sâkin cihet-i karz-ı şer‘îden işbu hazır bi’l-meclis Mustafa Beşe b. Abdullah’a yüz on beş guruş ve kezâlik hazır bi’l-meclis İbrahim Ağa b. Mustafa’ya dört yüz yetmiş beş guruş ve kezâlik hazır bi’l-meclis Hüseyin Beşe b. Yakub’a za‘aferân bahâsından yüz yetmiş guruş ve kezâlik hazır bi’l-meclis Hasan Beşe b. Şa‘ban’a cihet-i emânetden üç yüz otuz esedî guruş deynleri için hükm-i hâkim ile yüz yirmi günden beri odasında mahbûs olan bâ‘isü hâze’l-kitâb Mehmed Beşe b. Mahmud’un iflâsı zâhir olursa habsden ıtlâk oluna deyü buyruldu-i şerîf vârid olmağla mezbûr Mehmed Beşe’den vech-i âtî üzre istihbâr-ı şer‘î sudûrundan sonra udûl-i Müslimînden olup zikrolunan Şeyh Vefa Mahallesi ahâlîsinden Mahmud b. Abdullah ve Mustafa b. Ahmed ve Derviş b. Ahmed ve Osman b. Abdurrahman ve odabaşısı olan Mehmed Beşe b. İsmail nâm kimesneler li-ecli’l-ihbâr meclis-i şer‘a hâzırûn olup istihbâr olunduklarında fi’l-hakīka zikrolunan deynleri için yüz yirmi günden beri odasında mahbûs olan mezbûr Mehmed Beşe’nin üzerinde lâbis olduğu libâsından gayrı ism-i mâl ıtlâk olunur bir şey’i ve bir habbesi olmayıp müflis ve mu‘dim ve fakīrdir deyü dâyinleri olan mezbûrûn muvâcehelerinde her birleri alâ-tarîkı’ş-şehâde haber verdiklerinden sonra mezbûr Mehmed Beşe deynlerini edâya kuvvet ve vüs‘at hâsıl edinceye değin dâyinleri olan mezbûrûn Mustafa Beşe ve İbrahim Ağa ve Hüseyin Beşe ve Hasan [Beşe] rızâları ile bilâ-kefîl habsden ıtlâk olunup mâ-hüve’l-vâki‘ bi’t-taleb ketb olundu. Fi’l-yevmi’s-sâdis min-Zilka‘deti’ş-şerîfe li-sene tis‘în ve elf. Şuhûdü’l-hâl: Ahmed Beşe b. ( ) el-Mübâşir, Mehmed Çelebi b. Haydar, Ahmed Çelebi b. Piyale, Mustafa Çelebi b. Ahmed, Ahmed Bey b. Cafer.