Bab Mahkemesi 54 Numaralı Sicil (H. 1102 / M. 1691) cilt: 20, sayfa: 317 Hüküm no: 379 Orijinal metin no: [65a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Pavle’nin terekesinden gemi hissesinin satılması Mahrûse[-i Galata]’da Balıkpazarı kurbunda sâkine iken bundan akdem hâlik olan Yani v. Pavle nâm zımmînin verâseti, zevce-i metrûkesi Akanda bt. Todori nâm nasrâniye ile sulbî oğulları Pavlo ve Todori ve Preşkova ve Yani’ye münhasıra olduğu mütehakkik oldukdan sonra merkūme Akanda ba‘de’t-ta‘rîfi’l-mu‘teber kendi tarafından asâleten ve oğulları sıgār-ı mezbûrûnun tesviye-i umûrlarına kıbel-i şer‘den mansûbe vasîsi olmağla vesâyeten meclis-i şer‘-i şerîf-i enverde, bâ‘isü hâze’l-kitâb el-Hâc Hasan b. Abdullah nâm kimesne mahzarında ikrâr-ı tâm ve takrîr-i kelâm edip, yirmi dört zirâ‘ şayka ta‘bîr olunur beynimizde ma‘lûme sefînenin on sehimden iki sehim şâyi‘ını, işbu hâzır bi’l-meclis el-Hâc Mehmed Ağa b. Mahmud’un ve bir sehim dahi işbu el-Hâc Hicâzî mülkü olup mezbûr el-Hâc Mehmed Ağa kendinin iki sehimden bir sehim şâyi‘ini bundan akdem zevcim hâlik-i mezbûr Yani’ye yedi yüz guruş semen-i makbûza bey‘ ve teslîm ve üç sene mukaddem semenini dahi ahz u kabz ettiğinden sonra mezbûr Yani hâlik olmağla, vech-i muharrer üzre mârru’z-zikr sefînenin üç sehimden mülk-i müşterâsı olan bir sehim-i şâyi‘ini bana ve sıgār-ı mezbûrdan irsen intikāl edip ve sıgār-ı mezbûrûnun hisselerini bey‘ her vechile enfa‘ ve evlâ olduğu mütehakkik olmağla, mülk-i mevrûsumuz olan sâlifü’z-zikr bir sehm-i şâyi‘i ba‘de’n-nizâ‘ ve’l-müzâyede ve inkıtâ‘u’r-rağbe semen-i mislinden vakt-i bey‘de ezyed beş yüz beş guruşa mezbûr el-Hâc Hasan üzerinde karâr [65b] ve ziyâde ile tâlib-i âhar zuhûr etmemekle mezbûr el-Hâc Hasan’a asâleten ve vesâyeten tarafeynden îcâb ve kabûlü hâvî şurût-ı müfsideden ârî mezbûrûn el-Hâc Mehmed Ağa ve Hicâzî’nin huzûrlarında ba‘de’l-iştirâ edâ ve teslîm, semeni olan meblağ-ı mezbûr beş yüz beş guruşu huzûr-ı müslimînde bana teslîm, ben dahi bi’l-asâle ve bi’l-vesâye ahz u kabz eyledim. Ba‘de’l-yevm zikr olunan sefîneden ber vech-i muharrer mülk-i mevrûsumuz olan bir sehim şâyi‘-i mezkûr mesfûr el-Hâc Hasan’ın mülk-i müşterâsı olup ve sıgār-ı mezbûrûnun alâka ve medhali kalmamışdır, keyfe mâ yeşâ ve yahtâr mutasarrıf olsun dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ min Cumâdelâhire sene 1102. Şuhûdü’l-hâl: Fahrü’l-akrân Ali Ağa b. ( ) çavuşân, Hasan Efendi İmâm-ı Hocapaşa, Yazıcı Yakub Çelebi, el-Hâc Mehmed Çavuş, el-Hâc Süleyman, Mehmed b. Şaban.