Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 83 Hüküm no: 40 Orijinal metin no: [10b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Valide Sultan kethudası iken vefat eden Mustafa Efendi’nin küçük çocuklarına kendi akarlarından nafaka takdir edildiği Vâlide Sultân kethudâsı merhûm Mustafa Efendi’nin evlâd-ı sıgārının nafaka hüccetleridir. Dârü’s-saltanati’s-seniyye Kostantıniyye el-mahmiyede Akbıyık Mahallesi ahâlîsinden olup bundan akdem sultânü’l-muhadderât tâcü’l-mestûrât aliyyetü’z-zât safiyyetü’s-sıfât devletlü vâlide sultân -dâmet ismetühâ- hazretlerinin kethudâları iken mahrûse-i Edirne’de vedâ‘-ı âlem-i fânî eden merhûm Mustafa Efendi’nin evlâd-ı sıgārı Mehmed Ağa ve Hasan Ağa ve Süleyman Ağa’nın tesviye-i emirlerine kıbel-i şer‘-i enverden mansûb vasîleri olan umdetü’l-a‘yân Yeğen Ahmed Ağa b. es-Seyyid Salih meclis-i şer‘-i hatîrde bi’l-vesâye takrîr-i kelâm ve bast-ı merâm edip vasîleri olduğum sıgār-ı merkūmûnun babaları merhûm-ı mûmâ-ileyhden intikāl eden akārâtları icârâtından her birine kadr-ı ma‘rûf ve yine bir re’s hâdim ve hâdimelerine kezâlik kadr-ı ma‘lûm nafaka ve kisve-bahâ farz ve takdîr olunması matlûbumdur dedikde hâkim-i muvakki‘-i sadr-ı kitâb -tûbâ-lehû ve hüsnü-meâb- hazretleri dahi merkūmûn Mehmed Ağa ve Hasan Ağa ve Süleyman Ağa’dan her birine ber-vech-i muharrer babalarından intikāl eden akārâtı icârâtından beher yevm yüz ellişer akçeden dört yüz elli akçe ve üç re’s hâdimlerine dahi yirmi beşer akçeden yetmiş beş akçe ve üç re’s hâdimelerine dahi yirmi beşer akçeden yetmiş beş akçe ki min-haysü’l-mecmû‘ târih-i kitâbdan beher yevm altı yüz akçe nafaka ve kisve-bahâ farz ve takdîr edip meblağ-ı mefrûz-ı mezbûr altı yüz akçeyi merkūmûna harc ve sarfa ve lede’l-iktizâ istidâneye müşârün-ileyh Ahmed Ağa’ya izin birle mâ-vaka‘a bi’t-taleb ketb olundu. Fi’l-yevmi’l-işrîn mine’l-Muharremi’l-harâm li-sene tis‘în ve elf. Şuhûdü’l-hâl: Fahrü’l-müderrisîn Süleyman Efendi b. el-Hâc Veli, fahrü’l-a‘yân el-Hâc Musa Ağa b. Mehmed, fahrü’l-eşbâh el-Hâc Rasûl Efendi b. Ahmed, Mehmed Efendi b. İbrahim, el-Hâc Hasan Ağa b. Abdullah, es-Seyyid Yahya Ağa b. Salih, Abdurrahman b. Himmet, Abdullah b. Abdülmennan, Abdullah Efendi b. ( ) el-imâm ve gayruhum mine’l-huzzâr.