Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 84 Hüküm no: 41 Orijinal metin no: [10b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yaralama ile vefat eden Kasap Hüseyin b. Mustafa’nın vârislerince olayla ilgili açılan davanın reddedildiği Mahrûse-i Galata muzâfâtından kasaba-i Beşiktaş’da Maçuka Mahallesi’nde sâkin olup bundan akdem mecrûhen vefât eden Kasab Hüseyin b. Mustafa nâm müteveffânın verâseti zevce-i metrûkesi Neslihan bt. Hüseyin’e ve sulbî sagīr oğulları İsmail ve Mehmed’e ve sagīre kızı Havva’ya münhasıra olduğu şer‘an zâhir ve müte‘ayyin oldukdan sonra sıgār-ı mezbûrûnun ammileri ve tesviye-i emirlerine kıbel-i şer‘den mansûb vasîleri olan Hasan Çelebi b. Mustafa ile mezbûre Neslihan meclis-i şer‘-i hatîrde kasaba-i mezbûrede Sinan Paşa Mahallesi ahâlîsinden İmâm Salih Efendi b. İbrahim ve Müezzinbaşı Mustafa Efendi b. Mehmed ve Mustafa Çelebi b. Mehmed ve Mehmed Efendi b. Ebîbekir [ve] el-Hâc Mehmed b. Fazlı ve Hüseyin Çelebi b. Mahmud ve Hasan b. Abdullah ve Halil Ağa b. Mehmed ve Es‘ad Çelebi b. Mehmed ve Beşir Efendi b. Receb ve Süleyman Ağa b. Hasan nâm kimesneler ile civârında olan kefere mahallesinden Papa İstakes v. Ohan ve Baba Kostantin v. Yani ve Darko v. Hristo ve Yanaki v. Dimitri ve Kirkor v. Yani ve Avraham v. Kasber ve Panayot v. Yorgi ve Kasber v. Baryam ve Dimitri v. Kostantin ve Ohan v. Bedros ve Kasber v. Kirkor ve Yorgi v. Yani nâm zimmîler ve Yahûdilerden Avraham v. Sayce ve diğer Avraham v. Mosi ve Avraham v. Aslan ve Sermayil v. Salti ve Kobrad v. Yakor ve David v. Aslan ve Yako v. Hayim ve Kamal v. Sayca? nâm Yahûdiler muvâcehelerinde vesâyeten ve asâleten üzerlerine da‘vâ ve takrîr-i kelâm edip müteveffâ-yı mezbûr Hüseyin târih-i kitâbdan yirmi üç gün mukaddem ba‘de’l-asr zikrolunan Sinan Paşa Mahallesi ortasında mecrûhen maktûl bulunmağın hâlâ mezbûrûndan suâl olunup mûceb-i şer‘îsi icrâ olunmak matlûbumuzdur dediklerinde gıbbe’s-suâl merkūmûn cevâblarında maktûl-i mezbûr hayatında mahalle-i mezbûrede vâki‘ lonca yerinde tarîk caddesinde lahm bey‘ ederken gāib ani’l-meclis Moşko nâm Yahûdî maktûl-i mezbûru tutup isimleri ma‘lûmumuz değil birkaç kimesne satır ta‘bîr olunur âlet-i câriha ile mecrûh eylediklerinden nâşî maktûl-i mezbûr dahi menziline gelip sekiz gün mürûrundan sonra menzilinde vefât edip hatta müdde‘iyân-ı mezbûrân yedlerinde olan keşif hücceti nâtıka olduğu üzre târih-i mezbûrda maktûl-i mezbûr mecrûh olup sekiz gün mürûrundan sonra menzilinde vefât eylediğini ikrâr dahi eylediler deyü def‘ ile mukābele edicek isre’l-istintâk müdde‘iyân-ı mezbûrân Hasan Çelebi ve Neslihan kazıyye mezbûrûnun tafsîl eyledikleri vech üzre olduğunu bi’t-tav‘i’s-sâf ikrâr ve i‘tirâf etmeğin mûcebince müdde‘iyân-ı mezbûrân Hasan Çelebi ve Neslihan bî-vech mu‘ârazadan men‘ ve def‘ olunup mâ-hüve’l-vâki‘ bi’t-taleb ketb olundu. Fi’l-yevmi’s-sâdis min-Zilka‘deti’ş-şerîfe li-sene tis‘în ve elf. Şuhûdü’l-hâl: İbrahim Haseki b. ( ) el-Mübâşir, İsa Çavuş b. Mehmed, Mehmed b. Mustafa Tezkireci, Receb Beşe b. Muharrem, Yusuf b. Hüseyin Bostânî, Mehmed Beşe b. İbrahim, Osman Bey b. Abdullah.