Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 89 Hüküm no: 48 Orijinal metin no: [12a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hidar v. Nuh adlı Yahudinin sâbık Anadolu Kazaskeri Mustafa Efendi’den kiraladığı ev için verdiği icâre-i muacceleyi kira akdi feshedildiği için geri alması Husûs-ı âti’l-beyânın mahâllinde tahrîri iltimâs olunmağın savb-ı şer‘-i mergūbdan Mevlânâ Hüseyin Efendi b. Himmet <> sâbıkā Anadolu Kādıaskeri olan a‘lemü’l-ulemâi’l-izâm efdalü’l-fudalâi’l-fihâm yenbû‘u’l-fezâil ve’l-e‘âlî metbû‘i’l-efâzıl ve’l-e‘âlî alemü’l-ilm ve’l-hüdâ menârü’l-fazl ve’t-tekā sa‘âdetli Mustafa Efendi hazretlerinin mahmiye-i İstanbul’da Tevkī‘î Cafer Çelebi Mahallesi’nde vâki‘ sa‘âdethânelerine varıp zeyl-i kitâbda muharrerü’l-esâmî olan Müslimîn huzûrunda akd-i meclis-i şer‘-i mübîn eyledikde mahmiye-i mezbûre hısnı ebvâbından Balat kapısı hâricinde Karabaş Mahallesi’nde mütemekkin tâife-i Yahûd’un Kiroz cemâ‘atinden Hidar? v. Nuh nâm Yahûdî meclis-i ma‘kūd-ı mezbûrda müşârün-ileyh Mustafa Efendi mahzarlarında ikrâr ve takrîr-i kelâm edip müşârün-ileyh hazretleri bundan akdem mahrûse-i Galata muzâfâtından Kuruçeşme demekle ma‘rûf karyede vâki‘ bir tarafdan Mosi v. Mosi nâm Yahûdî mülkü ve bir tarafından Tabiboğlu Avraham nâm Yahûdî mülkü ve bir tarafdan sâhil-i bahr ve bir tarafdan tarîk-ı âm ile mahdûd fevkānî beş bâb odayı ve bir kenîfi ve altında iki mahzeni ve dört bâb pazarcı dükkânını ve bir mu‘attal bozahâneyi müştemil olan mülk menzili cemâ‘at-i mezbûreden işbu hazır bi’l-meclis Yako v. Mosi nâm Yahûdiden iki bin altı yüz guruş semen-i medfû‘a iştirâ ve tesellüm edip müceddeden binâ eyledikleri medreseleri için vakf eylediklerinden sonra menzil-i mezbûru altı yüz esedî guruş icâre-i mu‘accele ve yüz yirmi beş akçe icâre-i müeccele ile bana tevliyetleri hasebiyle îcâr ve teslîm ben-dahi minvâl-i muharrer üzre istîcâr ve tesellüm etmişdim, hâlâ müşârün-ileyh hazretleri asl-ı bey‘i mezbûr Yako ile bi’t-terâzî fesh ve ikāle etmeleri ile bi’t-tevliye benim ile dahi fesh-i icâre etmeğin [12b] müşârün-ileyh hazretlerine mukaddemâ mu‘accel nâmına verdiğim meblağ-ı mezbûr altı yüz guruşu işbu meclis-i ma‘kūdda yedlerinden (...) ahz ü kabz eyledim dedikde gıbbe’t-tasdîkı’ş-şer‘î husûs-ı mezbûru mevlânâ-yı mezbûr mahâllinde tahrîr ba‘dehû ma‘an irsâl olunan Abdülfettah ile meclis-i şer‘a gelip alâ-vukū‘ihî inhâ ve takrîr etmeğin mâ-hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min-Zilka‘deti’ş-şerîfe li-sene tis‘în ve elf. Şuhûdü’l-hâl: Fahrü’l-müderrisîni’l-kirâm es-Seyyid Mehmed Efendi b. Eyyub, fahrü’l-müderrisîn Uşşâkīzâde Osman Efendi, es-Seyyid Abdülaziz Efendi el-imâm, Mehmed Efendi b. Mustafa, Şeyhzâde İbrahim Efendi, el-Hâc Abdurrahman b. Rasûl, el-Hâc İsmail b. Ali, el-Hâc Mehmed Çukadâr.