Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 90 Hüküm no: 49 Orijinal metin no: [12b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hersek Sancağı mutasarrıfı Mustafa Paşa’nın Mustafa Bey b. Ali Paşa’ya olan borcunun kefilinden tahsil olunması Mahmiye-i İstanbul’da Tûtî Latîf Mahallesi sâkinlerinden fahrü’l-akrân Mustafa Bey b. Ali Paşa meclis-i şer‘-i hatîr-i lâzımü’t-tevkīrde Vilâyet-i Rumeli’nde vâki‘ Hersek Sancağı’nda mutasarrıf olan Mustafa Paşa’nın kethudâsı olan es-Seyyid Ebûbekir Ağa b. es-Seyyid Mustafa mahzarında üzerine da‘vâ ve takrîr-i kelâm edip müşârün-ileyh Mustafa Paşa’ya bin seksen dokuz Ramazan gurresinden (...) ay tamamına değin müeccel ve mev‘ûd olup iki bin beş yüz kıt‘a esedî guruşumu idâne ve teslîm edip ol dahi istidâne ve tesellüm eyleyip mukābelesinde yedinde mülkü olup Havâss-ı Refî‘a kazâsına tâbi‘ Papasköyü nâm karyede vâki‘ lede’l-ahâlî ve’l-cîrân ma‘lûmü’l-hudûd mülk çiftliğini yedime rehin vaz‘ ve teslîm ben-dahi irtihân ve tesellüm eylediğimden sonra meblağ-ı mezbûr iki bin beş yüz esedî guruşa kethudâsı mezbûr es-Seyyid Ebûbekir Ağa ile gāib ani’l-meclis İbrahim [nâm] kimesneden her biri müstakil emir ve kabûlü hâviye kefâlet-i sahîha-i şer‘iye ile kefîl olmağın suâl olunup meblağ-ı mezbûrun mecmû‘unu müstakil kefâletine binâen mezbûr es-Seyyid Ebûbekir Ağa’dan alıverilmesi matlûbumdur dedikde gıbbe’s-suâl mezbûr es-Seyyid Ebûbekir Ağa cevâbında meblağ-ı mezkûrun mecmû‘una mezbûr İbrahim Ağa ile iştirâken kefîl olmuşidik deyü iştirâken kefîl olduğunu ikrâr, müstakil mecmû‘-ı meblağ-ı mezkûr iki bin beş yüz guruşa kefîl olduğunu inkâr edicek müstakil mecmû‘-ı meblağ-ı mezbûr iki bin beş yüz guruşa mezbûr es-Seyyid Ebûbekir Ağa’nın kefîl olduğunu beyâna müdde‘î-i mezbûra mehl-i şer‘î verildikden sonra ikrârı mertebesi olup iştirâken kefîl olmağla hissesine lâzım gelen meblağ-ı mezbûr iki bin beş yüz esedî guruşun nısfı olan bin iki yüz elli guruşu müdde‘î-i mezbûr Mustafa Bey’e edâ ve teslîme merkūm kethudâ es-Seyyid Ebûbekir Ağa’ya tenbîh birle mâ-vaka‘a bi’t-taleb ketb şüd. Fi’l-yevmi’s-sâbi‘ min-Zilka‘deti’ş-şerîfe li-sene 1090. Şuhûdü’l-hâl: Abdullah Efendi b. Mustafa, Mehmed Beşe b. Mustafa, diğer Mehmed Beşe b. Receb, Mustafa Beşe b. Veli ve gayruhum.