Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 95 Hüküm no: 55 Orijinal metin no: [14a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa b. Süleyman’ın vasîsi olan amcası Hüseyin Ağa’daki parasını teslim aldığı Husûs-ı âti’l-beyânın mahâllinde ketb ü tahrîri iltimâs olunmağın cânib-i şer‘-i mutahhardan Mevlânâ Abdullah Efendi b. Mustafa irsâl olunup ol dahi umdetü’l-emâsil ve’l-akrân Mehmed Ağa b. Süleyman Ağa’nın mahmiye-i İstanbul’da Müneccim Sadi Mahallesi’nde sâkin olduğu menzile varıp zeyl-i [rakīmde] mektûbetü’l-esâmî olan udûl-i Müslimîn mahzarlarında akd-i meclis-i şer‘-i mübîn eyledikde mezbûr Mehmed Ağa meclis-i ma‘kūd-ı mezbûrda li-ebeveyn ammi olup hâl-i sıgārında vasîyy-i mansûbu olan bâ‘isü’l-kitâb el-Hâc Hüseyin Ağa b. Osman mahzarında ikrâr-ı tâm ve takrîr-i kelâm edip defter-i kassâm-ı asker nâtık [olduğu] üzre pederim merhûm-ı müşârün-ileyh Süleyman Ağa terekesinden hisse-i irsiyem için makbûzu olan meblağ-ı ma‘lûmdan işbu hazır bi’l-meclis olan Halil Beşe yedi ve kefâleti ile Vilâyet-i Rumeli’nde Gelibolu kazâsına tâbi‘ Mürefte nâm karye ahâlîsine idâne ve teslîm eylediği altmış bin akçe için üçümüz bir yerde iken rızâmız ile merkūm Halil Beşe üzerine havâle-i sahîha ile beni havâle edip ben-dahi kabûl eylediğimden sonra bâkī yedinde olan altı yük on altı bin gümüş akçeyi bi’d-defa‘ât bana teslîm edip ben-dahi kabz ve tesellüm eyledim min-ba‘d ammim mezbûr el-Hâc Hüseyin Ağa yedinde ve zimmetinde bir akçe ve bir habbe bâkī hakkım kalmadı husûs-ı mezbûra müte‘allika târih-i kitâba gelince cemî‘ hukūk-ı ma‘lûme ve mechûle da‘vâsından ammim mezbûr el-Hâc Hüseyin Ağa’nın zimmetini ibrâ-i âmm-ı kātı‘u’n-nizâ‘ ile ibrâ ve ıskāt eyledim dedikde gıbbe’t-tasdîkı’ş-şer‘î husûs-ı mezbûru mevlânâ-yı mezkûr mahâllinde tahrîr ba‘dehû ma‘an irsâl olunan Mehmed Çelebi b. Receb ve İvaz Çelebi b. Abdullah [ile] meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb şüd. Fî 13 min-Zilka‘de sene 1090. Şuhûdü’l-hâl: Mustafa Efendi b. Rüstem, Hazinedâr Ali Çelebi b. Abdullah, Halil Odabaşı b. Mehmed, Mehmed Beşe b. Mehmed, Zülfikar Beşe b. Abdullah, Kasabzâde Ahmed b. Yusuf, Mehmed Beşe b. Mustafa ve gayruhum.