Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 101 Hüküm no: 63 Orijinal metin no: [15b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hanım bt. Mehmed Bey’in alacak davasında Matbah-ı Âmire emini Yusuf Efendi ile sulh olduğu Mahmiye-i İstanbul’da Nahılbend Mahallesi sâkinelerinden Âişe Hanım bt. Mehmed Bey meclis-i şer‘-i şerîf-i lâzımü’t-teşrîfde sâbıkā Matbah-ı Âmire emîni olan umdetü erbâbü’t-tahrîr ve’l-kalem zübdetü ashâbi’t-tastîr ve’r-rakām Yusuf Efendi b. Hüseyin tarafından husûs-ı âti’l-beyâna vekîl olduğu el-Hâc Ali b. İbrahim ve Ahmed Beşe b. Yusuf nâm kimesneler şehâdetleri ile şer‘an sâbit olan Mustafa Çelebi b. Hasan nâm kimesne mahzar[ında] ikrâr ve takrîr-i kelâm edip müvekkil-i mûmâ-ileyh Yusuf Efendi zimmetinde beynimizde ma‘lûm câriye bahâsından yüz yetmiş <> guruş hakkım vardır deyü bundan akdem taleb ve da‘vâ eylediğimde ol dahi inkâr etmekle beynimizde münâza‘ât-ı kesîre ve muhâsamât-ı şedîde vâkı‘a olmuşdu, el-hâletü hâzihî beynimize muslihûn tavassut edip da‘vâ-yı mezkûremden beni ve müvekkil-i mûmâ-ileyh Yusuf Efendi ile beynimizde yirmi esedî guruş üzerine inşâ-i akd-i sulh etdiklerinde ben-dahi sulh-i mezbûru kabûl ve bedel-i sulh olan meblağ-ı mezbûr yirmi esedî guruşu müvekkil-i mûmâ-ileyh yedinden tamamen ahz ü kabz eylediğimden sonra bâkī kalan yüz elli esedî guruşdan müvekkil-i mûmâ-ileyh Yusuf Efendi’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâbi‘ ve’l-işrîn min-Zilka‘deti’ş-şerîfe li-sene tis‘în ve elf. Şuhûdü’l-hâl: Ahmed Çavuş el-Mübâşir, Mehmed Çelebi b. Haydar, el-Hâc Mustafa Çukadâr, Mustafa Çelebi b. Ahmed, Ali Beşe b. Abdünnebi.