Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 104 Hüküm no: 65 Orijinal metin no: [16b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mehmed Ağa b. Süleyman’ın küçük kızı Rabia ile cariyesine nafaka takdir edildiği Mahmiye-i İstanbul’da Kızıltaş Mahallesi ahâlîsinden olup bundan akdem Uyvar kal‘ası muhâfazasında Dergâh-ı âlî yeniçerilerinin otuz dokuzuncu bölüğün çorbacısı iken vefât eden Mehmed Ağa b. Süleyman’ın sulbiye sagīre kızı Râbia’nın vâlidesi ve hâdınesi olan bâ‘isü hâze’l-kitâb Hadîce Hatun meclis-i şer‘-i şerîf-i lâzımü’t-teşrîfde takrîr-i kelâm <> ve ta‘bîr ani’l-merâm edip sadriye kızım sagīre-i mezbûre Râbia hâlâ hacr [ve] terbiyemde olmağla babası müteveffâ-yı mezbûrdan kendüye intikāl eden bin beş yüz on dört buçuk esedî guruş mâlından sagīre-i mezbûre ile hâdimesi olan câriye-i memlûkesi Mülâyim’e kadr-ı ma‘rûf nafaka ve kisve-bahâ farz ve takdîr olunmak matlûbumdur dedikde hâkim-i muvakki‘-i sadr-ı kitâb -tûbâ-lehû ve hüsnü-meâb- hazretleri dahi sagīre-i mezbûrenin babası müteveffâ-yı mezbûrdan müntakil mâlından yevmî onar akçe nafaka ve câriyesi mezbûre Mülâyim’e dahi yevmî beşer akçe nafaka ve kisve-bahâ farz ve takdîr edip meblağ-ı mefrûz-ı mezbûr on beş akçeyi mezbûretâna harc ve sarfa ve vakt-i zarûretde istidâneye ve lede’z-zafer rücû‘a vâlidesi mezbûre Hadice’ye izin birle izin verildi. Cerâ zâlike (...) fi’l-yevmi’s-sâbi‘ ve’l-işrîn min-Zilka‘deti’ş-şerîfe li-sene tis‘în ve elf. Şuhûdü’l-hâl: Eş-şeyh Mehmed Efendi b. Mustafa el-imâm, Ali Halîfe b. Mustafa el-müezzin, Mustafa Efendi b. Ramazan, İbrahim Efendi b. Halil, Ali b. Hasan, Sefer Beşe b. Yusuf ve gayruhum.