Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 105 Hüküm no: 66 Orijinal metin no: [16b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mehmed Ağa b. Süleyman’ın küçük kızı Rabia’nın vasîsi Kâtib Mehmed Efendi’nin eski vasîdeki paraları kabzettiği Mahmiye-i İstanbul’da Kızıltaş Mahallesi ahâlîsinden olup bundan akdem Uyvar kal‘ası muhâfazasında Dergâh-ı âlî yeniçerilerinin otuz dokuzuncu bölüğün çorbacısı iken vefât eden Mehmed Ağa b. Süleyman’ın sulbiye sagīre kızı Râbia’nın tesviye-i umûruna hâlâ kıbel-i şer‘den mansûb vasîsi olan Kâtib Mehmed Efendi b. Ali Çavuş meclis-i şer‘de kendüden mukaddem sagīre-i mezbûrenin vasîsi olup hizmet-i vesâyet-i mezbûreden tekâsülü olduğundan mâ‘adâ üzerinde <> mîrî mâl olup sagīre-i mezbûrenin mâlı itlâf olmak ihtimâli olmağile vesâyet-i mezbûreden azl ve ref‘ olunan el-Hâc Mehmed Ağa b. Sinan nâm kimesne mahzarında bi’l-vesâye ikrâr ve takrîr-i kelâm edip ber-vech-i muharrer mezbûr [17a] el-Hâc Mehmed Ağa bundan mukaddem sagīre-i mezbûrenin vasîsi olmağla bi’l-vesâye makbûzu olan bin altı yüz on dört buçuk guruşu hükm-i hâkim ile tahsîl için mezbûr el-Hâc Mehmed Ağa üzerine mübâşir ta‘yîn olunmağla mübâşir-i mezbûr dahi meblağ-ı mezbûru mezbûr el-Hâc Mehmed Ağa’dan tahsîl edip resmi için yüz guruşunu kabz eylediğinden sonra bâkī kalan bin beş yüz on dört buçuk guruşunu hâlâ vesâyetim hasebiyle vasîyy-i sâbık mezbûr el-Hâc Mehmed Ağa yedinden tamamen ahz ü kabz eyledim min-ba‘d yedinde bir akçe ve bir habbe bâkī kalmadı dedikde gıbbe’t-tasdîk mâ-vaka‘a bi’t-taleb ketb olundu. Fi’l-yevmi’s-sâmin ve’l-işrîn min-Zilka‘deti’ş-şerîfe li-sene tis‘în ve elf. Şuhûdü’l-hâl: es-Sâbıkūn.