Bab Mahkemesi 54 Numaralı Sicil (H. 1102 / M. 1691) cilt: 20, sayfa: 319 Hüküm no: 381 Orijinal metin no: [65b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şerbetçi esnafından Mustafa b. Murad ve Yuvan v. Hıram ve sâirlerin içkili şerbet imâl etmemeleri Mahmiye-i İstanbul’da vâki‘ şerbetçi tâifesinin kethüdâları Mustafa Çelebi b. Abdullah Ve yiğitbaşıları Ali Beşe b. Mustafa ve ihtiyârlarından el-Hâc Mustafa b. Halil ve Mehmed Çelebi b. Ömer ve Abdullah Çelebi b. Ömer ve Abdi Beşe b. Hasan ve Receb Çelebi b. Hasan ve Himmet Beşe b. Osman ve Mehmed Beşe b. Mehmed ve Hüseyin b. Ebûbekir ve Bektaş b. Bayram nâm kimesneler ve sâirleri meclis-i şer‘-i şerîf-i enverde, tâife-i mezbûreden olup mahmiye-i merkūmede Karaman’da şerbetçi olan Mustafa b. Murad ile Yuvan v. Hıram ve Koçi v. Tanaş ve Nasto v. Pançu ve Nikola v. İstefan nâm zimmîler muvâcehelerinde her biri takrîr-i kelâm ve ta‘bîr ani’l-merâm edip, kadîmü’l-eyyâmdan şerbetçi tâifesi tatlı ve baharlı şerbet işleyip şerbetlerine arak ve hamr katmayıp müskir şerbet işlemek memnû‘ iken, mezbûr Mustafa ve merkūmûn zimmîler müskir şerbet işlemekle, ba‘de’l-yevm vech-i meşrûh üzre müskir şerbet işlememek üzre kıbel-i şer‘den mezbûrlara tenbîh olunmak matlûbumuzdur dediklerinde, min ba‘d minvâl-i meşrûh üzre müskir şerbet işlemeyip tatlı ve baharlı şerbet işleyip tenbîh olunmaz ise cezâları görülmek üzre mezbûrlara tenbîh olunmağın, mâ vaka‘a bi’t-taleb ketb olundu. Fi’l-yevmi’s-sânî aşer min Cumâdelâhire sene 1102. Şuhûdü’l-hâl: Himmet b. Osman, Mustafa Ağa, Yahya Çelebi b. ( ), Mehmed Çelebi b. ( ), Mustafa Çelebi b. ( ) ve gayruhüm.