Bab Mahkemesi 54 Numaralı Sicil (H. 1102 / M. 1691) cilt: 20, sayfa: 320 Hüküm no: 382 Orijinal metin no: [65b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ümmühâni bt. Mustafa’nın Hasan Beşe b. Musli’den boşanması Mahmiye-i İstanbul’da Silivrikapısı dâhilinde İbrahimpaşa mahallesi sâkinelerinden Ümmühâni nâm hâtunun babası tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân Mustafa Efendi b. eş-Şeyh İbrahim ve İsmail Efendi b. Mehmed şehâdetleriyle sâbit olan el-Hâc Hasan b. Musli nâm kimesne meclis-i şer‘-i şerîf-i enverde, zevc-i muhâlı‘ı işbu bâ‘isü’l-kitâb Hasan Beşe b. el-Hâc Veli mahzarında bi’l-vekâle ikrâr ve takrîr-i kelâm edip, kızım müvekkile-i mezbûre Ümmühâni zevci merkūm Hasan Beşe zimmetinde mütekarrir ve ma‘kūdun-aleyh sekiz bin akçe mehr-i müeccelinden ve nafaka-i iddet-i mu‘ayyenesinden fâriğa olup ve me’ûnet-i süknâsı dahi kendi üzerine olmak üzre zevc-i mezkûr Hasan Beşe ile muhâla‘a-i sahîha-i şer‘iyye ile muhâla‘a olup, ol dahi ber vech-i muharrer hul‘-ı mezbûru kabûl eyledikden sonra hukūk-ı zevciyyete müte‘allika âmme-i da‘vâdan her biri âharın zimmetini ibrâ-i âmm-ı kātı‘u’l-hisâm [66a] ile ibrâ ve iskāt eylediler dedikde, gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sânî ve’l-ışrîn min Cumâdelâhire sene 1102. Şuhûdü’l-hâl: Mustafa Efendi b. eş-Şeyh Mehmed Efendi, İlyas Çelebi, el-Hâc Mustafa b. el-Hâc Ahmed, Hüseyin Beşe b. İvaz.