Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 111 Hüküm no: 71 Orijinal metin no: [19a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kaya adlı hatunun vekili vasıtasıyla arsasını Ebubekir Efendi b. Osman’a sattığı Mahmiye-i İstanbul’da Kırkçeşme kurbünde Firuzağa Mahallesi’nde sâkine iken bundan akdem vefât eden Ceyhun bt. Abdullah’ın verâseti sulbî kebîr oğlu Süleyman ile sulbiye sagīre kızı Kaya nâm hatuna münhasıra olup ba‘dehû mezbûr Süleyman dahi vefât edip verâseti sulbiye sagīre kızı Gevher’e ve li-ebeveyn kız karındaşı mezbûre Kaya’ya münhasıra olduğu şer‘an zâhir ve mütehakkık oldukdan sonra mezbûre Kaya Hatun’un zevci ve tarafından husûs-ı âtîye vekîl olduğu mezbûrenin zâtını ma‘rifet-i şer‘iye ile ârifân Mehmed Efendi b. Ahmed ve Abdülbaki Çelebi b. Ali şehâdetleriyle şer‘an sâbit olan el-Hâc Mustafa b. Mehmed meclis-i şer‘-i hatîr-i lâzımü’t-tevkīrde hâlâ Kamaniçe muhâfızı olan vezîr-i mükerrem Ahmed Paşa’nın dîvân efendisi olan umdetü erbâbü’t-tahrîr ve’l-kalem işbu râfi‘u’l-kitâb Ebûbekir Efendi b. Osman tarafından vekîl olup bimâ-hüve nehcü’s-sübût şer‘an vekâleti sâbite olan Sunullah Efendi b. Ali Efendi mahzarında bi’l-vekâle ikrâr ve takrîr-i kelâm edip müteveffiyân-ı mezbûrân Ceyhun ve Süleyman’ın tereke[sinden] olup bi’l-irsi’ş-şer‘î zevcem müvekkile-i mezbûre hissesine isâbet ve intikāl etmekle yedimde keşif hücceti nâtıka olduğu üzre ba‘de-nasbi’l-fâsıla ifrâz ve ta‘yîn olunan bir tarafdan ba‘zan Mahmud Efendi veresesi mülkü ve ba‘zan Osman Reis mülkü ve bir tarafdan vakıf oda ve bir tarafdan müvekkile-i mezbûrenin mülkü ve bir tarafdan (...) Hatun arsası ile mahdûde bi-hesâb-ı terbî‘î yüz elli sekiz buçuk zirâ‘ arsanın mezbûr Osman Reis ile zikrolunan vakıf oda tarafından tûlen dokuz buçuk zirâ‘ ve arzan dokuz buçuk zirâ‘ bi-hesâb-ı terbî‘î seksen altı zirâ‘ mülk arsa-i hâliyeyi iki taş duvarı ile vekîl-i mezbûr Sunullah Efendi’ye yüz altmış beş kıt‘a esedî guruşa tarafeynden îcâb ve kabûlü hâvî ve şurût-ı müfsideden ârî bey‘-ı kat‘î ile bey‘ ve teslîm ol dahi mûmâ-ileyh Ebûbekir Efendi için iştirâ ve tesellüm ve kabûl edip semeni olan meblağ-ı mezbûr yüz altmış beş esedî guruşu vekâletim hasebiyle yedinden tamamen ahz ü kabz eyledim ba‘de’l-yevm arsa-i merkūme müvekkil-i mûmâ-ileyh Ebûbekir Efendi’nin mülk-i müşterâsıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-hâmis min-Zilhicceti’ş-şerîfe li-sene tis‘în ve elf. Şuhûdü’l-hâl: Mustafa Efendi b. Murad, Ramazan Beşe b. Mehmed, Mehmed Reis b. Mustafa, Musa Beşe b. ( ), Mehmed Çelebi b. Haydar, Dilaver b. Abdullah, Bakkal Ahmed Beşe b. ( ), Tüccâr Yu (...) ve gayruhum mine’l-huzzâr.