Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 112 Hüküm no: 72 Orijinal metin no: [19a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Bey b. Ahmed’in varislerinin babalarından kalan bir evi Ahmed Çelebi b. Ömer’e sattıkları Medîne-i Ebâ Eyyûb-ı Ensârî mahallâtından Ahmed Dede Mahallesi’nde sâkin iken bundan akdem vefât eden İbrahim Bey b. Ahmed’in verâseti sinn [ve] cüsselerinin bulûğlarına tahammülü ve her biri bulûğuna meclis-i şer‘-i mutahharda mu‘terif olan sulbî kebîr oğlu Hasan Çelebi ile sulbiye kızları her birinin zâtı mahalle-i mezbûre sükkânından Süleyman Çelebi b. Zülfikar ve Yahya Çelebi b. Mustafa nâm kimesneler ta‘rîfleri ile mu‘arrefe olan Fâtıma ve Âişe ve Hadice’ye münhasıra olduğu şer‘an sâbit ve zâhir oldukdan sonra mezbûr Hasan Çelebi ile mezbûrât Fâtıma ve Âişe ve Hadîce meclis-i mezbûrda bâ‘isü hâze’l-kitâb Ahmed Çelebi b. Ömer mahzarında her biri ikrâr ve takrîr-i kelâm edip babamız müteveffâ-yı mezbûrun terekesinden olup mahalle-i mezbûrede vâki‘ bir tarafı Ahmed Ağa bağı ve bir tarafı Kenan mutasarrıf olduğu vakıf ve tarafeyni tarîk-ı hâs ile mahdûd fevkānî bir bâb oda ve bir sofa ve zât-ı eşcâr-ı müsmire ve gayr-ı müsmire hadîkayı müştemil mülk menzili mezbûr Ahmed Çelebi’ye tarafeynden îcâb ve kabûlü hâvî bey‘-ı kat‘î ile otuz bin akçe ile meclis-i akidde kabzımız ile muzayya‘a bir kabza fülûs-ı mevcûda ve müşârün-ileyhâ ve gayr-ı ma‘dûdeye bey‘ ve teslîm ol dahi iştirâ ve tesellüm ve kabz eylediğinden sonra semeni olan meblağ-ı mezbûr otuz bin akçeyi her birimiz beynimizde iktisâm edip bi-kadri’l-hısas mezbûr Ahmed Çelebi yedinden ahz ü kabz eyledik ba‘de’l-yevm menzil-i mahdûd-ı mezbûrda her birimizin alâkası kalmayıp mezbûr Ahmed Çelebi’nin mülk-i müşterâsı olmuşdur keyfe mâ yeşâ’ ve yahtâr mutasarrıf olsun dediklerinde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâmin min-Zilhicceti’ş-şerîfe li-sene tis‘în ve elf. Şuhûdü’l-hâl: Fahrü’l-a‘yân Ebûbekir Ağa b. Ömer, Ahmed Ağa b. Murad el-Bursevî, Abdullah Efendi b. Mehmed el-imâm, Abdullah Halîfe el-müezzin, Mehmed Çelebi b. Seyfullah, Ahmed Beşe b. Mahmud, Süleyman Beşe b. Zülfikar, Ali Çelebi b. Ahmed, Mustafa Çelebi b. ( ), el-Hâc Yahya b. ( ), Mahmud Çelebi b. ( ), Halil Çelebi b. ( ), İsmail Çelebi b. ( ), Hasan Efendi b. ( ) el-imâm, Bayram Halîfe el-müezzin.