Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 113 Hüküm no: 73 Orijinal metin no: [19a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden İbrahim Efendi’nin Hasan Paşa’daki alacağının varislerince tahsil edildiği Mahmiye-i İstanbul’da ( ) Mahallesi ahâlîsinden olup hâlâ Trabzon muhâfazasına ta‘yîn olunan emirü’l-ümerâi’l-kirâm Hasan Paşa’nın sâbıkā dîvân efendisi iken Diyarbekir’de vefât eden İbrahim Efendi’nin verâseti zevce-i metrûkesi Âişe Hatun bt. Mustafa ile sulbî sagīr oğulları İsmail ve Mustafa’ya münhasıra olduğu şer‘an sâbit ve zâhir oldukdan sonra mezbûre Âişe Hatun kendi tarafından asâleten ve sagīrân-ı mezbûrânın tesviye-i emirlerine kıbel-i şer‘den mansûbe vasîleri olmağla vesâyeten meclis-i şer‘-i hatîr-i lâzımü’t-tevkīrde işbu kitâb-ı sıhhat-nisâbın sahibi olan mûmâ-ileyh Hasan Paşa tarafından husûs-ı âti’l-beyâna vekîl olduğu Müezzin Mehmed Halîfe b. İsa ve Ömer b. Hasan nâm kimesneler şehâdetleri ile şer‘an sâbit olan Mehmed Efendi b. Ali nâm kimesne mahzarında ikrâr ve takrîr-i kelâm edip müvekkil-i mûmâ-ileyh [19b] Hasan Paşa bundan akdem Diyarbekir beylerbeyisi iken zevcim mezbûr İbrahim Efendi müvekkil-i mûmâ-ileyhin dîvân efendisi olduğu hâlde vefât eyledikde yanında mevcûde olan eşyâsı ber-mûceb-i defter-i kassâm ba‘de’l-bey‘ beş yüz yetmiş beş esedî guruşa bâliğ olmağla meblağ-ı mezbûr beş yüz yetmiş beş esedî guruşu [mü]vekkil-i mûmâ-ileyh Hasan Paşa kendi mesârifine sarfla istihlâk edip bize vâcibü’l-edâ zimmetinde deyni oldukdan sonra meblağ-ı mezbûru müvekkil-i mûmâ-ileyh Hasan Paşa bundan akdem hâkim-i muvakki‘-i sadr-ı kitâb -tûbâ-lehû ve hüsnü-meâb- hazretleri huzûrunda da‘vâ eylediğimde ol dahi ber-vech-i muharrer meblağ-ı mezbûr zimmetinde bize deyni olduğunu ikrâr ve yedime hüccet-i şer‘iye dahi vermekle hâlâ meblağ-ı mezbûr beş yüz yetmiş beş esedî guruş ile müteveffâ-yı mezbûrun muhallefâtından bir tîrkeş ve bir sîm kılıç ve üç mühür ve bir zilpûşu müvekkil-i mûmâ-ileyh Hasan Paşa yedinden asâlet ve vesâyetim hasebiyle tamamen ahz ü kabz eyledim min-ba‘d müvekkil-i mûmâ-ileyh Hasan Paşa yedinde ve zimmetinde zevcim müteveffâ-yı mezbûrun terekesinden bir akçe ve bir habbe bâkī kalmamışdır dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâmin min-Zilhicceti’ş-şerîfe li-sene tis‘în ve elf. Şuhûdü’l-hâl: Arslan Bey tâbi‘-i Hasan Paşa, Bostancı Hasan Bey, Hüseyin Efendi el-kâtib, (...) Çelebi b. Haydar, Ahmed Çelebi b. ( ) el-Muhzır.