Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 114 Hüküm no: 74 Orijinal metin no: [19b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ebubekir Efendi b. Osman’ın kölesi Abdullah b. Abdullah’ı azat ettiği Husûs-ı âti’l-beyânın mahâllinde tahrîri iltimâs olunmağın savb-ı şer‘den Mevlânâ Sunullah Efendi irsâl olunup ol dahi mahmiye-i İstanbul’da Mi‘mâr Ayas Mahallesi’nde sâkin Osman Reis b. Mehmed’in menziline varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i hatîr eyledikde hâlâ Kamaniçe muhâfızı olan vezîr-i mükerrem Ahmed Paşa’nın dîvân efendisi olan umdetü erbâbü’t-tahrîr ve’l-kalem Ebûbekir Efendi b. Osman tarafından husûs-ı âtîye vekîl olduğu Ramazan Beşe b. Mehmed ve Abdülbaki Çelebi b. Ali şehâdetleriyle şer‘an vekâleti sâbite olan mezbûr Osman Reis meclis-i ma‘kūd-ı mezbûrda müvekkil-i mûmâ-ileyhe rıkkını mu‘terif olan kasîrü’l-kāme mültehî zenciyyü’l-asl Abdullah b. Abdullah nâm siyah gulâm mahzarında bi’l-vekâle ikrâr ve takrîr-i kelâm edip oğlum müvekkil-i mûmâ-ileyh Ebûbekir Efendi mevsûf-ı mezbûr Abdullah’ı hasbeten lillâhi’l-aliyyü’l-azîm ve taleben li-merzâti’r-Rabbi’r-Rahîm mâlından tahrîr ve i‘tâk ve zümre-i ahrâr-ı [a]sliyyîne idrâc ve ilhâk eyledi ba‘de’l-yevm gulâm-ı mevsûf-ı mezbûr sâir ahrâr-ı asliyyîn gibi hür olup üzerinde velâdan gayrı hakkı kalmadı dedikde vâki‘ hâli mevlânâ-yı mezbûr mahâllinde tahrîr ba‘dehû meclis-i şer‘a gelip alâ-vukū‘ihî inhâ etmeğin mâ-vaka‘a bi’t-taleb ketb olundu. Fi’l-yevmi’s-sâlis aşer min-Zilhicceti’ş-şerîfe li-sene tis‘în ve elf. Şuhûdü’l-hâl: Mehmed Efendi b. Hızır el-Kādî, Mehmed Reis b. Mustafa, Mehmed Beşe b. ( ), Dilaver Beşe b. Abdullah, Yusuf b. Abdullah.