Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 114 Hüküm no: 75 Orijinal metin no: [19b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Muslı Efendi b. Hasan’ın küçük kızlarına Mustafa Ağa b. Receb’in vasî tayin edildiği Mahmiye-i İstanbul’da Haydarüddin Bey Mahallesi’nde sâkin iken bundan akdem vefât eden Muslı Efendi b. Hasan’ın kızları İsmihan ve Ümmühan nâm sagīrelerin tesviye-i emirlerine bir vasî nasb ve ta‘yîn olunmak lâzım ve mühim olmağın emânet ile mevsûf ve diyânet ile ma‘rûf ve vesâyet-i mezbûre uhdesinden gelmeğe kemâ-yenbagī kādir idüğü zeyl-i sahîfede muharrerü’l-esâmî olan Müslimîn ihbârları ile müte‘ayyin olan işbu hâfızü’l-kitâb fahrü’l-akrân Mustafa Ağa b. Receb nâm kimesneyi hâkim-i muvakki‘-i sadr-ı kitâb -tûbâ-lehû ve hüsnü-meâb- efendi hazretleri sagīretân-ı mezbûretânın hadd-i rüşd ve sedâdlarına varınca vasî nasb ve ta‘yîn buyurduklarında ol dahi vesâyet-i mezbûreyi kabûl ve hizmet-i lâzımesin edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’l-hâmis aşer min-Zilhicceti’ş-şerîfe li-sene tis‘în ve elf. Şuhûdü’l-hâl: Umdetü’l-a‘yân Nezir Ağa b. Abdullah, Latîf Efendi b. Ahmed, Osman Efendi b. Mehmed, Süleyman Ağa b. Abdullah, Ali Efendi el-imâm-ı Ayasofya, Çukadâr Mustafa Çelebi b. ( ).