Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 115 Hüküm no: 76 Orijinal metin no: [19b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa b. Mustafa’nın zaptettiği Süleyman b. Hüseyin adlı tüccara ait köle ve ticaret mallarını iade etmesi Vilâyet-i Rumeli’nde medîne-i Siroz tüccârlarından el-Hâc Süleyman b. Hüseyin nâm kimesne meclis-i şer‘-i şerîf-i lâzımü’t-teşrîfde zikirleri âtî gulâm ile çukaya vâzı‘u’l-yed olup bi’l-fi‘il Vilâyet-i Anadolu’da vâki‘ kasaba-i Bergama voyvodası olan fahrü’l-akrân Ahmed Ağa b. Mustafa nâm kimesne mahzarında üzerine da‘vâ ve takrîr-i kelâm edip bundan akdem abd-i me’zûnum olan işbu hazır bi’l-meclis İvaz b. Abdullah’a medîne-i İzmir’den varıp çuka iştirâ edip [20a] medîne-i Siroz’a getirmek için mâlımdan iki bin iki yüz esedî guruş ve kezâlik işbu hazır bi’l-meclis el-Hâc Hüseyin b. Mehmed dahi mâlından bin altı yüz esedî guruş ve kezâlik hazır bi’l-meclis Dimitri v. Esteryan dahi mâlından iki bin beş yüz esedî guruş def‘ ü teslîm abd-i mezbûr İvaz dahi ahz ü kabz edip diğer Dimitri nâm zimmîyi varıp gelince değin abd-i mezbûra hizmet etmek için bin altı yüz akçeye istîcâr edip medîne-i İzmir’e gönderdiğimizden sonra abd-i mezbûr İvaz dahi yedinde olan cümle meblağa emrimiz üzre [derkenâr: musanna‘ kırmızı ve musanna‘ elvan-ı mütenevvi‘a yetmiş bir pastav çuka ile iki pastav yeşil Londirine sahh, mühür: Abdühû Mehmed] çuka iştirâ edip getirirken esnâ-i tarîkda Güzelcehisar-ı Menemen kurbünde üzerine harâmî inip müste’cir-i mezbûr Dimitri’yi katl ve ba‘zı mertebe çukadan nehb ü gāret eyleyip bâkī yirmi dokuz denk çuka ile mezbûr İvaz zikrolunan kasaba-i Bergama hânına geldikde voyvoda-i mezbûr Ahmed Ağa’nın vekîli olan Osman nâm kimesne abd-i mezbûrun yedinden bi-gayr-ı vechin şer‘î ahz ü kabz edip hâlâ mahmiye-i İstanbul’a getirmişlerdir suâl olunup ihkāk-ı hak olunmak matlûbumdur dedikde gıbbe’s-suâl mezbûr Ahmed Ağa cevâbında abd-i mezbûr ile zikrolunan yirmi dokuz denk çukaya vaz‘-ı yedini ikrâr lâkin abd-i mezbûr müdde‘î-i mezbûrun abd-i me’zûnu olup ber-vech-i muharrer zikrolunan çuka müdde‘î-i mezbûr ile mezbûr el-Hâc Hüseyin’in ve mezbûr Dimitri’nin mâlları ile iştirâ olunup mülkleri olduğunu inkâr edicek müdde‘î-i mezbûr el-Hâc Süleyman’dan müdde‘âsını mübeyyine beyyine taleb olundukda udûl-i Müslimînden olup zikrolunan medîne-i Siroz ahâlîsinden Ebûbekir b. Mustafa ve Derviş b. Osman nâm kimesne[ler] meclis-i şer‘a hâzırân olup istişhâd olunduklarında fi’l-hakīka işbu abd-i mezbûr İvaz müdde‘î-i mezbûr el-Hâc Süleyman’ın abd-i me’zûnu olup ber-vech-i muharrer bundan akdem zikrolunan medîne-i Siroz’da müdde‘î-i mezbûr el-Hâc Süleyman İzmir’den çuka iştirâ etmek için mezbûr İvaz’ın yedine mâlından iki bin iki yüz esedî guruş ve mezbûr el-Hâc Hüseyin dahi mâlından bin altı yüz guruş ve mezbûr Dimitri dahi mâlından iki bin beş yüz esedî guruş bizim huzûrumuzda def‘ ü teslîm mezbûr İvaz dahi ber-vech-i muharrer tesellüm ve kabz edip medîne-i İzmir’e varıp yedinde olan cümle akçe ile çuka iştirâ edip getirirken zikrolunan Bergama hânında voyvoda vekîli olan Osman bi-gayr-ı vechin şer‘î ahz ü kabz etmişidi abd-i mezbûr müdde‘î-i mezbûr el-Hâc Süleyman’ın abd-i me’zûnu olup sâlifü’z-zikr yirmi dokuz denk çuka işbu müdde‘î-i mezbûr el-Hâc Süleyman ile mezbûr el-Hâc Hüseyin’in ve mezbûr Dimitri’nin mülkleridir biz bu husûsa bu vech üzre şâhidleriz şehâdet dahi ederiz deyü her biri edâ-yı şehâdet-i şer‘iye ettiklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm ve’t-tenbîh mâ-vaka‘a bi’t-taleb ketb olundu. Fi’l-yevmi’s-sâmin aşer min-Zilhicceti’ş-şerîfe li-sene tis‘în ve elf. Şuhûdü’l-hâl: Mehmed Bey b. Ahmed, Mehmed Çelebi b. Haydar, Ahmed Çelebi b. Piyale, Hüseyin Çelebi b. Ebûbekir.