Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 116 Hüküm no: 77 Orijinal metin no: [20a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Dahkî Mustafa Efendi’nin vasiyeti üzere kethudası Mustafa Bey’e terekesinden 150 kuruş verilmesi Mahmiye-i İstanbul’da Şeyh İbn Vefâ Meydânı kurbünde Molla Gürânî Mahallesi’nde sâkin iken bundan akdem vedâ‘-ı âlem-i fânî eden merhûm Dahkî Mustafa Efendi b. Mirza’nın zâhirde vâris-i ma‘rûfu olmamağla terekesi taraf-ı beytü’l-mâle âid olduğu müte‘ayyin oldukdan sonra müteveffâ-yı mezbûrun hayatında kethudâsı olan bâ‘isü hâze’l-kitâb Mustafa Bey b. Mehmed nâm kimesne Dîvân-ı Hümâyûn-ı sa‘âdet-makrûnda ma‘kūd meclis-i şer‘de müteveffâ-yı mezbûrun terekesine bi’l-emâne vâzı‘u’l-yed olan câmi‘ü’l-emvâli’s-Sultâniye hâfızü’l-hazâini’l-Osmâniye hâlâ şıkk-ı evvel defterdârı olan Hasan Efendi mahzarında üzerine da‘vâ ve takrîr-i kelâm edip efendim müteveffâ-yı mezbûr Dahkî Mustafa Efendi hayatında bi-emrillâhi te‘âlâ kazâ-i nahb eylediğinde mâlından bana yüz elli esedî guruş verile deyü vasiyet ve musırrân alâ-îsâihî vefât etmekle meblağ-ı mezbûru müteveffâ-yı mezbûrun vasiyeti üzre mûmâ-ileyh Hasan Efendi’den <> taleb eylediğimde bana def‘ ü teslîmden imtinâ‘ eder suâl olunup meblağ-ı mezbûru müteveffâ-yı mezbûrun tereke-i vâfiyesinden bana teslîme mûmâ-ileyh Hasan Efendi’ye tenbîh olunmak matlûbumdur dedikde gıbbe’s-suâl ve akībe’l-inkâr müdde‘î-i mezbûr Mustafa Bey’den müdde‘âsını mübeyyine beyyine taleb olundukda udûl-i Müslimîn’den olup mahalle-i mezbûre sükkânından Mustafa b. Mehmed ve Mi‘mâr Ayas Mahallesi sükkânından Mehmed Çavuş b. Mehmed nâm kimesneler li-ecli’ş-şehâde meclis-i ma‘kūd-ı mezbûra hâzırân olup istişhâd olunduklarında [20b] fi’l-hakīka müteveffâ-yı mezbûr Dahkî Mustafa Efendi hayatında bizim huzûrumuzda bi-emrillâhi te‘âlâ kazâ-i nahb eylediğimde mâlımdan yüz elli esedî guruş kethudâm mezbûr Mustafa Bey’e verile deyü vasiyet ve musırrân alâ-îsâihî vefât etmişidi biz bu husûsa bu vech üzre şâhidleriz şehâdet dahi ederiz deyü her biri edâ-i şehâdet-i şer‘iye ettiklerinde ba‘de’t-ta‘dîl ve’t-tezkiye şehâdetleri makbûle oldukdan sonra mûcebince meblağ-ı mezbûr yüz elli esedî guruşu müteveffâ-yı mezbûrun vasiyeti üzre tereke-i vâfiyesinden müdde‘î-i mezbûr Mustafa Bey’e def‘ ü teslîme mûmâ-ileyh Hasan Efendi’ye tenbîh birle mâ-hüve’l-vâki‘ bi’t-taleb ketb olundu. Fi’l-yevmi’s-sâmin aşer min-Zilhicceti’ş-şerîfe li-sene tis‘în ve elf. Şuhûdü’l-hâl: Umdetü erbâbü’t-tahrîr ve’l-kalem Ali Efendi Tezkire-i ûlâ, zübdetü ashâbi’t-tastîr ve’r-rakām Mustafa Efendi Tezkire-i sâniye, Mehmed Ağa Kethudâ-yı Hazret-i Efendi, Çukadâr el-Hâc Mustafa ve gayruhum.