Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 117 Hüküm no: 78 Orijinal metin no: [20b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Hüseyin Paşa’nın terekesinden bazı emlak, eşya ve köleleri oğullarından Mehmed’e bıraktığının ispatlandığı Mahmiye-i İstanbul’da Sarı Nasuh Mahallesi’nde sâkin iken bundan akdem vedâ‘-ı âlem-i fânî eden merhûm Mîralem Hüseyin Paşa’nın verâseti zevce-i metrûkesi Emine bt. Abdullah nâm hatun ile sulbiye kebîre kızı Fâtıma Hanım’a ve sagīre kızı Ümmü Gülsüm’e ve sulbî sagīr oğulları Ahmed Bey’e ve Mehmed Bey’e münhasıra olduğu şer‘an sâbit ve zâhir oldukdan sonra mezbûre Emine tarafından husûs-ı âti’l-beyâna sâbitü’l-vekâle vekîli olan Mehmed Bey nâm kimesne meclis-i şer‘-i hatîr-i lâzımü’t-tevkīrde sagīr-i mezbûr Mehmed’in tesviye-i umûruna kıbel-i şer‘den mansûb vasîsi olan fahrü’l-akrân el-Hâc Mehmed Ağa b. Ahmed Efendi mahzarında bi’l-vekâle üzerine da‘vâ ve takrîr-i kelâm edip müteveffâ-yı mezbûr Hüseyin Paşa’nın terekesinden olup mahalle-i mezbûrede vâki‘ iki tarafı tarîk-ı âm ve bir tarafdan mahalle-i mezbûre imâmı ile müezzinine meşrûta vakıf menziller ve bir tarafdan müteveffât Rukiye Hanım mülkü ile mahdûd tabaka-i ulyâda bir bâb oda ve tabaka-i sâniyede altı bâb oda ve bir hazîne odası ve iki sofa ve bir kaygan döşeme sofa ve iki kenîf ve tabaka-i sâlisede on üç bâb oda ve tabaka-i râbi‘ada iki ahır ve iki bi’r-i mâ’ ve bir matbah ve matbahın fevkinde bir bâb odayı müştemil olup arsasının bir mikdârının senede Simkeş İskender Ağa vakfına iki yüz elli akçe mukāta‘ası ve bir mikdârının mârrü’z-zikr Sarı Nasuh vakfına seksen akçe mukāta‘ası olup ebniyesi mülk olan hâriciye ta‘bîr olunur menzili ve yine mahalle-i mezbûrede vâki‘ iki tarafdan tarîk-ı âm ve bir tarafdan Solak Ahmed Çelebi mülkü ve bir tarafdan Solak İbrahim Çelebi kızı Ümmühani nâm hatun mülkü ile mahdûd bir arpa anbârını ve bir samanhâneyi ve zât-ı eşcâr-ı müsmire bahçe [ve] gayr-ı müsmireyi müştemile arsasından bir mikdârının senede Râbia Hatun vakfına iki yüz akçe mukāta‘a ve bir mikdârının sâlifü’z-zikr Sarı Nasuh vakfına yüz yirmi akçe mukāta‘ası olup ebniye ve [e]şcârı mülk olan bahçeyi ve yine Havâss-ı Refî‘a muzâfâtından Terkos nâhiyesine tâbi‘ Mirahur nâm karyede vâki‘ lede’l-ahâlî ve’l-cîrân hudûdu ma‘lûm olup muhavvâta-i hâriciyesinde üç bâb oda ve bir orta sofa ve üç ahır ve bir samanhâne ve iki matbah ve bir fırın ve zât-ı eşcâr-ı müsmire bahçe ve bahçeye [muttasıl] bir kıt‘a bağı ve muhavvâta-i dâhiliyesinde beş bâb oda ve iki sofa ve bir köşk ve bi’r-i mâ ve zât-ı eşcâr-ı müsmire bahçe ve bahçeye muttasıl bir kıt‘a bağı müştemil çiftlik ta‘bîr olunur mülk menzili ve menzil-i mezbûrda sâkin Dilaver nâm memlûk ile Gülistan [nâm] câriyeyi ve menzil-i mezbûrda mevcûd cemî‘ esâs-ı beyt ve evânî-i nühâsiye ve gayr-ı nühâsiye ve âlât-ı hırâseti ve altmış aded öküzlerini ve sığırları ve kısrakları ve on sekiz aded mertebânî ve bir beyâz fağfûrî kâse ve bir mücevher fincan ve bir fağfûrî fincan tabağı ile yüz dâneli mercan tesbih ve bir altın kılıç ve bir mücevher mellûta düğmesi ve üç aded sîm gaddâre ve reşmesi ve zinciri ve enseliği sîm bir dîvân rahtı ve beş aded sîm çubuk raht ve bir sırmalı ve beçeli raht ve bir çift üzengi ve bir sîm leğen ve bir sîm ibrik ve bir sîm kahve sinisi ve bir sırmalı Şâm didiği ve altı aded zerdûz eğeri [ve] üç aded sırma dikdik ve bir sîm tîrkeş ve iki sîm topuz ve al çukaya kaplı bir samur kürk def‘a al çukaya kaplı bir kakum kürk ve on aded sîm düğmeli bir yeşil çuka mellûta ve dolama ve çatma ta‘bîr olunur on çift gılâflı müsta‘mel yasdık ve bir Acem keçesi ve beş aded velence ve iki Cezâyir velencesi ve iki kebîr Selanik keçesi ve beş aded kebîr tencere ve kapaklı beş aded sahan ve bir kebîr bakır sini ve bir bakır tepsi ve bir sîm gülâbdân ve bir sîm buhûrdân ve bir Mısır peşkiri ve bir havlı Siroz peşkiri ve on iki aded minder ve on iki aded yorgan ve iki Cezâyir ihrâmı ve bir sîm devât ve bir sadefkârî piştahta ve iki sîm şâtır kuşağı ve altı hacerli bir sîm ma‘cûn hokkası ve bir küçük kıt‘a Mushaf-ı Şerîf ve bir Muhammediye ve bir Envârü’l-âşıkīn ve bir İmâdü’l-İslâm ve bir Şevâhid ve bir Ta‘bîrnâme ve bir Behcetü’t-tevârih ile Abdullah ve Kenan nâm memlûkü ile Bedahşan nâm câriye vasîyy-i mûmâ-ileyh el-Hâc Mehmed Ağa cümlesini sagīr-i mezbûrun olmak üzre bi’l-vesâye ahz ü kabz ve zabt ve tasarruf etmekle hâlâ suâl olunup emlâk-i mezbûre ile zikrolunan gulâm ve câriye ve eşyâdan müvekkilem mezbûrenin hissesini bana teslîme tenbîh olunmak matlûbumdur dedikde [21a] gıbbe’s-suâl vasîyy-i mezbûr el-Hâc Mehmed Ağa cevâbında müteveffâ-yı mezbûr Hüseyin Paşa hayatında emlâk-i mezbûre ile mârrü’z-zikr gulâm ve câriye ve eşyâyı oğlu mezbûr Mehmed Bey’e hîbe-i sahîha-i şer‘iye ile hîbe edip velâyeten kabz eylediğinden sonra bin seksen üç senesi Muharremi’l-harâmının on altıncı gününde mahmiye-i İstanbul’da mesned-nişîn-i şerî‘at-ı garrâ olan hâkim-i muvakki‘-i sadr-ı kitâb -tûbâ-lehû ve hüsnü-meâb- hazretleri tarafından husûs-ı mezbûru tahrîre me’zûn Mehmed Emîn Efendi’yi menziline getirip tahrîr ettirmişidi deyü târih-i mezbûr ile müverraha ve min-külli’l-vücûh takrîr-i meşrûhasını nâtık bir kıt‘a hüccet-i şer‘iye ibrâz edicek hüccet-i mezbûre vekîl-i mezbûr muvâcehesinde feth ü kırâet ve istintâk olundukda vekîl-i mezbûr hüccet-i mezbûrenin mazmûnunu bi’l-külliye inkâr <> etmeğin vasîyy-i mezbûrdan hüccet-i mezbûrenin mazmûnuna beyyine taleb olundukda zeyl-i hüccetde isimleri mastûr olan Müslimînden Mehmed Halîfe b. Yusuf ve Hüseyin Efendi b. Ahmed nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr Hüseyin Paşa hayatında zikrolunan Sarı Nasuh Mahallesi’nde vâki‘ hudûd-ı mezbûr ile mahdûd olan menzil-i mezbûrun mülk ebniyesini kezâlik mahalle-i mezbûrede vâki‘ zikrolunan bahçenin mülk eşcârını ve ebniyesini ve Havâss-ı Refî‘a kazâsına tâbi‘ Terkos nâhiyesinde Mirahur nâm karyede vâki‘ hâriciye ve dâhiliyede vâki‘ büyût-ı adîdeyi müştemil çiftlik ta‘bîr olunur menzil-i mezbûr ile bağları ve içinde sâkin Dilaver nâm gulâm ile Gülistan nâm câriyeyi ve esâs-ı beyt ve evânî-i nühâsiye ve gayr-ı nühâsiye ve âlât-ı hırâseti ve öküzleri ve sığırları ve kısrakları ve zikrolunan on sekiz mertebânî ve bir beyâz fağfûrî kâseyi ve mücevher fincanı ve fağfûrî fincan tabağı ve mercan tesbihi ve altın kılıcı ve mücevher mellûta düğmesini ve sîm gaddâreyi ve reşme ve zinciri ve enseli sîm dîvân rahtı ve beş sîm çubuk raht ve sırmalı ve cebeli rahtı ve sîm üzengileri ve sîm leğen ve sîm ibrik ve sîm kahve sinisi ve sırmalı Şâm dikdiği ve altı aded zerdûz eğerlerini ve üç aded sırma dikdik ve sîm tîrkeş ve iki sîm topuz ve zikrolunan kürkleri ve on aded sîm düğmeli bir yeşil çuka mellûtayı ve dolamayı ve yasdıkları gılâfını ve bir Acem keçesi ve beş aded mâ‘i velence ve iki Cezâyir velencesi ve iki kebîr Selanik keçesi ve tencereleri ve sahanları ve bakır tepsi ve gülâbdân ve buhûrdânı ve on iki minder ve on iki yorgan ve Cezâyir ihrâmını ve sîm devâtı ve sadefkârî piştahtayı ve şâtır kuşaklarını ve ma‘cûn hokkasını ve Mushaf-ı Şerîf’i ve Muhammediye’yi ve Envârü’l-âşıkīn’i ve İmâdü’l-İslâm’ı ve Şevâhidü’n-nübüvve’yi ve Ta‘bîrnâme’yi ve Behcetü’t-tevârih’i ve Abdullah ve Kenan nâm gulâmlar ile Bedahşan nâm câriyeyi oğlu sagīr-i mezbûr Mehmed Bey’e hîbe ve temlîk edip velâyeten kendi kabz eylediğinden sonra mezbûr Mehmed Emin Efendi’ye menzilinde tahrîr ettirip târih-i mezbûrede mesned-nişîn-i şerî‘at-ı garrâ olan hâkim-i mûmâ-ileyh hazretlerinin imzâsıyla mümzât ve hatmiyle mahtûme hüccet-i mezbûre tahrîr ettirip ve emlâk-i mezbûrenin arsalarını dahi meccânen mütevellîleri izniyle ferâgat etmişidi biz bu husûsa bu vech üzre şâhidleriz şehâdet dahi ederiz deyü her biri edâ-i şehâdet-i şer‘iye ettiklerinde ba‘de’t-ta‘dîl ve’t-tezkiye şehâdetleri makbûle olmağın mûcebince vekîl-i mezbûr Mehmed Bey bî-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’s-sânî aşer min-Zilka‘deti’ş-şerîfe li-sene tis‘în ve elf. Şuhûdü’l-hâl: Fahrü’l-müderrisîni’l-kirâm Ahmed Efendi, Ahmed Efendi b. el-Hâc Süleyman, Mustafa Efendi b. Mehmed, el-Hâc Osman Ağa b. Ahmed ve gayruhum.