Bab Mahkemesi 54 Numaralı Sicil (H. 1102 / M. 1691) cilt: 20, sayfa: 320 Hüküm no: 383 Orijinal metin no: [66a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Beşe b. Mehmed’in terekesinin Beytülmâl’den varisi Mehmed b. Ahmed’e teslim edilmesi Mahmiye-i İstanbul’da Balabanağa mahallesi sükkânından ve Dergâh-ı âlî Yeniçerilerinin Otuz dokuzuncu Cemâ‘atine mahsûs oda ahâlîsinden olup, vilâyet-i Anadolu’da Yalakâbâd kazâsına tâbi‘ Kocaderesi nâm karyede bundan akdem fevt olan Mustafa Beşe b. Mehmed b. İbrahim’in li ebeveyn kız karındaşı oğlu ve zî-rahm cihetinden hasran vârisi olan Mehmed b. Ahmed nâm kimesne meclis-i şer‘-i şerîf-i enverde, Dergâh-ı âlî Yeniçerilerinin mukaddemâ emîn-i beytülmâl olmağla müteveffâ-yı mezbûrun vâris-i ma‘rûfu olmamak zu‘muyla terekesine vâzı‘u’l-yed olan râfi‘ü hâze’l-kitâb Abdullah Ağa b. Abdülmennân tarafından husûs-ı âti’z-zikri tasdîka sâbitü’l-vekâle vekîl olan Beytülmâl kapı kethüdâsı Hüseyin Beşe b. Ahmed mahzarında ikrâr-ı tâm ve takrîr-i kelâm edip, mûrisim merkūm Mustafa Beşe fevt oldukda ben âhar diyârda bulunmakla, emîn-i mezbûr müteveffâ-yı mezbûrun zâhir[de] vâris-i ma‘rûfu olmamak zu‘muyla terekesinden ber-mûceb-i defter-i kassâm-ı askerî dört bin beş yüz yetmiş iki akçeye vâzı‘u’l-yed olmuşidi. Hâlâ emîn-i mezbûr meblağ-ı merkūm dört bin beş yüz yetmiş iki akçeyi bana def‘ ve teslîm, ben dahi tamâmen ahz u kabz eyledim. Fîmâ ba‘d tereke-i müteveffâ-yı mezbûra müte‘allika da‘vâdan emîn-i merkūm ile nâzır Bayram Ağa’nın zimmetlerini ibrâ-i âm ile ibrâ ve iskāt eyledim dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis aşer min Cumâdelâhire sene 1102. Şuhûdü’l-hâl: Abdülkādir Efendi, İbrahim Çelebi b. Ahmed, İbrahim b. Mehmed, Ali b. Bâli.