Bab Mahkemesi 54 Numaralı Sicil (H. 1102 / M. 1691) cilt: 20, sayfa: 321 Hüküm no: 384 Orijinal metin no: [66a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Ahmed b. Mehmed’in alacak davasının reddi Mahmiye-i İstanbul’da Tercüman Yunus mahallesinde sâkin el-Hâc Ahmed b. Mehmed nâm kimesne meclis-i şer‘-i şerîf-i enverde, bâ‘isü hâze’s-sifr Agob v. Kiragos nâm zimmî muvâcehesinde üzerine da‘vâ ve takrîr-i kelâm edip, gāib ani’l-meclis Manas nâ[m] zimmîde her topu yüz otuz beşer akçeye olmak üzre yedimden iştirâ ve makbûz eylediği on bir top kırmızı bez semeninden bin dört yüz seksen beş akçe hakkım olup, meblağ-ı mezbûra mesfûr Agob tarafından emr ve kabûlü hâviye kefâlet-i sahîha-i şer‘iyye ile kefîl olmağın, hâlâ suâl olunup kefâlet-i merkūmesine binâ’en meblağ-ı mezbûrun alıverilmesi matlûbumdur dedikde, gıbbe’s-suâl ve akībe’l-inkâr ve müdde‘î-i mezbûrdan sıdk-ı makāline beyyine taleb olundukda, ityân-ı beyyineden izhâr-ı acz ile istihlâf etmeğin, fi’l-hakīka müdde‘î-i mezbûrun gāib-i mezbûr zimmetinde cihet-i mezbûreden hakkı olan meblağ-ı mezbûr bin dört yüz seksen beş akçeye kefâlet-i sahîha-i şer‘iyye ile kefîl olmayıp, ol vechile müdde‘î-i mezbûrun zimmetinde bin dört yüz seksen beş akçe hakkı olmadığına mesfûr Agob’a yemîn teklîf olundukda, ol dahi hasbe’l-mes’ûl yemîn billâhi’llezî enzele İncîle alâ İsâ -aleyhi’s-selâm- etmeğin, mûcebiyle müdde‘î-i mezbûr el-Hâc Ahmed bilâ-beyyine bî-vech mu‘ârazadan men‘ olunup, mâ vaka‘a bi’t-taleb [ketb] olundu. Fî evâhiri Cumâdelâhire sene 1102. Şuhûdü’l-hâl: Es-Seyyid Yahya b. es-Seyyid Burhaneddin, Ebûbekir Çelebi b. Hâfız Hüseyin, İbrahim Çelebi b. Ahmed.