Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 130 Hüküm no: 91 Orijinal metin no: [24a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud b. İbrahim’in hırsızlık davasının reddedildiği Mahmiye-i İstanbul’da merhûm Sultân Mehmed Han aleyhi’r-rahmetü ve’l-gufrân tabhhânesinde sâkin Mahmud b. İbrahim nâm kimesne <> Dîvân-ı Hümâyûn-ı sa‘âdet-makrûnda ma‘kūd meclis-i şer‘-i hatîrde dîvân-ı mezbûrda reis kâtiblerinden işbu râfi‘u’l-kitâb Osman Efendi b. eş-Şeyh Mahmud mahzarında üzerine da‘vâ ve takrîr-i kelâm edip târih-i kitâb senesi Ramazan-ı Şerîfi’nden üç gün mukaddem müsâferet vechi üzre mezbûr Osman Efendi’nin mahmiye-i mezbûrede Emir Buhârî Mahallesi’nde vâki‘ menziline varıp yatmak murâd eylediğimde bir kırmızı kîse içinde dokuz yüz yetmiş guruşluk yaldız ve gayr-ı yaldız altınımı döşek altına sokup uyuduğumdan sonra zikrolunan altını mezbûr Osman Efendi ahz ü kabz ve mesârifine sarf ü istihlâk etmekle hâlâ suâl olunup ihkāk-ı hak olunmak matlûbumdur dedikde [24b] gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz ve istihlâf etmeğin fi’l-hakīka ber-vech-i muharrer müdde‘î-i mezbûrun bir kırmızı kîse içinde dokuz yüz yetmiş guruşluk yaldız ve gayr-ı yaldız altınını ahz ü kabz ü istihlâk etmeyip üzerine red ve damândan bir nesne lâzım gelmediğine mezbûr Osman Efendi’ye yemîn teklîf olundukda ol dahi bimâ-vefkı’l-mesûl yemîn billâhi te‘âlâ etmeğin mûcebince müdde‘î-i mezbûr Mahmud bilâ-beyyine mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’s-sâmin ve’l-işrîn min-Zilhicceti’ş-şerîfe li-sene tis‘în ve elf. Şuhûdü’l-hâl: Fahrü’l-akrân Çavuşbaşı Mehmed Ağa, Meylî? Ali Efendi Kîsedâr, Receb Efendi Kâtib-i Dîvân, Yusuf Efendi Kâtib-i Dîvân, Beylikçi Ahmed Efendi.