Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 131 Hüküm no: 92 Orijinal metin no: [24b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden İmâm Mehmed Efendi’den kalan kölenin kızı Ayşe’ye ait olduğunun ispatlandığı Mahmiye-i İstanbul’da Sancakdâr Hayreddin Mahallesi’nde sâkin iken bundan akdem vefât eden İmâm Mehmed Efendi b. Mehmed’in verâseti zevce-i metrûkesi Neslihan bt. Mustafa ile vâlidesi Hadîce bt. Hüseyin’e ve sulbiye kebîre kızı Âişe’ye ve li-ebeveyn karındaşları Abdullah ve Mustafa’ya münhasıra olduğu şer‘an sâbit ve zâhir oldukdan sonra mezbûre Âişe meclis-i şer‘de müteveffâ-yı mezbûrun terekesine vâzı‘u’l-yed olan mezbûre Hadîce ile mezbûrân Abdullah ve Mustafa taraflarından husûs-ı âti’l-beyâna vekîl olduğu nehc-i şer‘î ve tarîk-ı mer‘î üzre sâbit olan İmâm Ahmed Efendi b. Ahmed ile mezbûre Neslihan mahzarlarında üzerlerine da‘vâ ve takrîr-i kelâm edip işbu açık kaşlı elâ gözlü Rusiyyetü’l-asl tahmînen on yaşında olan Abdullah nâm gulâm babam müteveffâ-yı mezbûrun hayatında abd-i memlûkü olup târih-i kitâbdan beş sene mukaddem benim hâl-i sıgārımda bana hîbe ve temlîk ve yine velâyeten benim için ittihâb ve kabz ve temellük edip târih-i mezbûrdan beri mevsûf-ı mezbûr Abdullah benim mülk-i mevhûbum iken terekesinden olmak üzre verese-i merkūmûn gulâm-ı mezbûra bi-gayr-ı hakkın vaz‘-ı yed ederler suâl olunup kasr-ı yedlerine ve bana teslîme tenbîh olmak matlûbumdur dedikde gıbbe’s-suâl ve akībe’l-inkâr müdde‘iyye-i mezbûreden müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden olup mahalle-i mezbûre sükkânından Mehmed Efendi b. Osman ve Abdi Çelebi b. Mehmed nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka târih-i kitâbdan beş sene mukaddem müteveffâ-yı mezbûr Mehmed Efendi hayatında kızı müdde‘iyye-i mezbûre sagīre iken bizim huzûrumuzda mevsûf-ı mezbûr Abdullah’ı kızı müdde‘iyye-i mezbûreye hîbe ve temlîk ve yine velâyeten mezbûre Âişe için ittihâb ve kabz ve temellük edip mevsûf-ı mezbûr Abdullah târih-i mezbûrdan beri müdde‘iyye-i mezbûre Âişe’nin mülk-i mevhûbudur biz bu husûsa bu vech üzre şâhidleriz şehâdet dahi ederiz deyü her biri edâ-yı şehâdet-i şer‘iye ettiklerinde ba‘de’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm ve’t-tenbîh mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-işrîn min-Zilhicceti’ş-şerîfe li-sene tis‘în ve elf. Şuhûdü’l-hâl: Mehmed Çelebi b. Haydar, Hazînedâr Yusuf Çelebi b. ( ), el-Hâc Mustafa Çukadâr, Ahmed Bey b. ( ) el-Muhzır, Hüseyin Efendi el-kâtib.