Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 133 Hüküm no: 94 Orijinal metin no: [25a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi b. Ahmed Efendi’nin arsasını Abdülhalim Efendi b. Abdullah’a bağışladığı Mahmiye-i İstanbul’da Debbağyunus Mahallesi’nde sâkin Mustafa Çelebi b. Ahmed Efendi nâm kimesne meclis-i şer‘-i hatîr-i lâzımü’t-tevkīrde sâbıkā Basra kādısı olan işbu bâ‘isü’l-kitâb Abdülhalim Efendi b. Abdullah mahzarında ikrâr ve takrîr-i kelâm edip akd-i âtî sudûruna değin binâsı yedimde mülk ve hakkım olup arsası beher yevm huzûrumda üç İhlâs-ı Şerîf tilâvet etmek üzre olmadan [ulemâdan] bir süknâya muhtâc kimesneye meşrûta olup tûlen on altı zirâ‘ ve arzan altı buçuk zirâ‘ bi-hesâb-ı terbî‘î yüz dört zirâ‘ arsa üzerinde olan ebniye bundan akdem olan Cibali <> harîkinde bi’l-külliye muhterik olup arsa-i sırfa kalmağla menzil-i mezbûru müceddeden binâya mevkūf bir şey’i olmayıp meşrûtiyet üzre mütevellîsi olup mahalle-i mezbûrede bundan akdem imâm olan Şeyh Abdullah Efendi nâm kimesne babam müteveffâ-yı mezbûr Ahmed Efendi’ye dilediği gibi mülkü olmak üzre mâlıyla müceddeden binâya izin verdiğinden sonra babam müteveffâ-yı mezbûr dahi izn-i mezkûra binâen müceddeden arsa-i mezbûre üzerine taş duvarlı menzil binâ ve ihdâs edip kırk seneden mütecâviz mâlikiyet üzre sâkin olup vefât eyledikde bi’l-irsi’ş-şer‘î menzil-i mezbûr bana intikāl edip ben-dahi nice zaman mutasarrıf olmağla ebniye-i mezbûre işbu târih-i kitâb senesinde vâki‘ olan harîkde muhterik olup taş duvarları kalmağla zikrolunan taş duvarları dahi mezbûr Abdülhalim Efendi’ye kırk esedî guruşa bey‘ ve teslîm ol dahi iştirâ ve tesellüm eylediğinden sonra semeni olan meblağ-ı mezbûr kırk esedî guruşu mezbûr Abdülhalim Efendi yedinden tamamen ahz ü kabz edip ve arsasını dahi meccânen rızâm ile menzil-i mezbûra meşrûtiyet üzre mütevellîsi olan mahalle-i mezbûre imâmı olan Abdullah Efendi izniyle mezbûr Abdülhalim Efendi’ye ferâgat ol dahi kabûl eyledi dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’t-tâsi‘ ve’l-işrîn min-Zilhicceti’ş-şerîfe li-sene tis‘în ve elf. Şuhûdü’l-hâl: Mehmed Ağa b. Mustafa, Hasan Efendi b. Mustafa el-müezzin, el-Hâc Yusuf b. Ali, Ali Efendi b. ( ) Çukur Bostan İmâmı, İbrahim Beşe Bâzergân b. ( ), Ebûbekir Beşe Bâzergân b. ( ), İbrahim b. Abdullah el-Müe[zzi]n, Attar Abdullah Çelebi b. ( ), Hâncı el-Hâc Hasan b. Abdullah, Ma‘cûncu el-Hâc Ahmed.