Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 134 Hüküm no: 95 Orijinal metin no: [25a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rahime bt. Abdullah’ın vefat eden oğlunun vasîlerine açtığı alacak davasının reddedildiği Mahmiye-i İstanbul’da Sinan Paşa Mahallesi’nde sâkin iken bundan akdem vefât eden Kör Ali Ağa b. Ahmed’in verâseti zevce-i metrûkesi Rahime bt. Abdullah ile sulbî kebîr oğlu Süleyman’a münhasıra olup ba‘dehû mezbûr Süleyman dahi vefât edip verâseti vâlidesi mezbûre Rahime ile ammisi oğlu Ahmed’e münhasıra olduğu şer‘an zâhir ve mütehakkık oldukdan sonra mezbûre Rahime Hatun tarafından husûs-ı âtîye vekîl olduğu mezbûrenin zâtını ma‘rifet-i şer‘iye ile [ârifân] Bayram Çelebi b. Ali ve İbrahim Çelebi b. Abdülhalim şehâdetleriyle şer‘an sâbit olan Mehmed Efendi b. Receb meclis-i şer‘-i hatîrde müteveffâ-yı mezbûr Süleyman’ın hâl-i sıgārında kıbel-i şer‘den mansûb vasîleri olan işbu bâ‘isü’l-kitâb Kalender Mehmed Çelebi b. Abdullah ve Hasan Beşe b. Ahmed nâm kimesneler mahzarlarında üzerlerine da‘vâ ve takrîr-i kelâm edip müteveffâ-yı evvel-i mezbûr Kör Ali Ağa’nın hîn-i vefâtında taraf-ı şer‘den muhallefâtı tahrîr olundukda mezbûr Kalender Mehmed Çelebi vesâyeti hasebiyle ma‘rifet-i şer‘le ba‘de’l-müzâyede bey‘ eylediği eşyâ bahâsı beş yük elli üç bin akçeye bâliğ olmuş-iken muhallefât-ı mezbûreyi tahrîr eden kâtib ile ittifâk edip bir yük on bin akçesini tenzîl eylediğinden <> mâ‘adâ akārâtı icârâtından otuz altı bin akçesini dahi ahz <> edip ve defter-i kassâmdan hâric on bin akçe kıymetli eşyâsını dahi ketm ü ihfâ etmekle min-haysü’l-mecmû‘ bir yük elli altı bin akçeyi mesârifine sarf ve istihlâk <> edip mezbûr Hasan Beşe dahi dört ay mürûrundan sonra vasî nasb olunmağla akār[â]t icârâtından yirmi bin akçe ahz ü kabz ve mesârifine sarf [ve] istihlâk etmeğin hâlâ mezbûrânın ketm ü ihfâ ettikleri meblağayn-ı mezbûreynden müvekkilem mezbûreye isâbet eden hisse-i şer‘iyesini bi’l-vekâle mezbûrândan taleb ederim suâl olunsun dedikde gıbbe’s-suâl mezbûr Kalender Mehmed Çelebi cevâbında müteveffâ-yı mezbûr Süleyman hayatında [25b] bâliğ ve âkıl ve rüşd ve sedâda nâil oldukdan sonra da mezbûr Süleyman ile beynimizde cârî olan ahz ü i‘tâyı izn-i şer‘le ba‘de’l-muhâsebe zimmetinde dokuz bin sekiz yüz bir akçe ziyâde hakkım zuhûr edip ve mezbûr Hasan Beşe’nin kezâlik otuz dört bin sekiz yüz akçe hakkı zuhûr etmekle müteveffâ-yı mezbûr Süleyman’dan hayatında taleb ve da‘vâ eylediğimizden beynimizde nizâ‘-ı küllî vukū‘undan sonra müteveffâ-yı mezbûr Süleyman babası müteveffâ-yı mezbûr Ali Ağa’nın cemî‘ terekesinden kendüye isâbet eden hisse-i şer‘iyesini bizden tamamen ahz ü kabz eyleyip cümle terekeye müte‘allika âmme-i de‘âvî ve mutâlebâtdan benim ve mezbûr Hasan Beşe’nin zimmetini ibrâ-i âmm-ı kātı‘u’n-nizâ‘la ibrâ ve ıskāt edip biz dahi meblağayn-ı mezbûreyne müte‘allika cemî‘ da‘vâdan mezbûr Süleyman’ın vâlidesi mezbûrenin zimmetlerini ibrâ ve ıskāt edip hatta müteveffâ-yı mezbûr Süleyman hayatında vech-i meşrûh üzre hissesini ahz eylediğini şuhûd mahzarında ikrâr ve işhâd etmişidi deyü def‘le mukābele edicek isre’l-istintâk ve’l-inkâr mezbûr Kalender Mehmed Çelebi’den def‘-i mezbûruna beyyine taleb olundukda udûl-i Müslimînden olup mahmiye-i mezbûrede Kırkçeşme kurbünde Firuzağa Mahallesi ahâlîsinden Abdülkadir Beşe b. Ebîbekir ve Sinan Paşa Mahallesi’nden Mehmed Beşe b. Ahmed nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka mezbûrân Kalender Mehmed Çelebi ve Hasan Beşe müteveffâ-yı mezbûr Süleyman hayatında bâliğ ve âkıl ve rüşd ve sedâda nâil oldukda beynlerinde izn-i şer‘le muhâsebe gördüklerinde müteveffâ-yı mezbûr Süleyman zimmetinde mezbûr Kalender Çelebi’nin dokuz bin sekiz yüz bir akçe hakkı ve mezbûr Hasan Beşe’nin otuz dört bin sekiz yüz akçe hakkı zuhûr etmekle beynlerinde nizâ‘-ı küllî vukū‘undan sonra müteveffâ-yı mezbûr Süleyman babası müteveffâ-yı mezbûr Ali Ağa’nın cemî‘ terekesinden kendüye isâbet eden hisse-i şer‘iyesini mezbûrân Kalender Mehmed Çelebi ve Hasan Beşe yedlerinden tamamen ahz eyledim deyü ikrâr eylediğinden mâ‘adâ cümle tereke[ye] müte‘allika âmme-i de‘âvî ve mutâlebâtdan mezbûrânın zimmetini bizim huzûrumuzda ibrâ-i âm ile ibrâ ve ıskāt edip mezbûrân Kalender Çelebi ve Hasan Beşe dahi meblağayn-ı mezbûreyne müte‘allika cemî‘ da‘vâdan müteveffâ-yı mezbûr Süleyman’ın vâlidesi mezbûre Rahime’nin zimmetlerini ibrâ ve ıskāt etmişidi biz bu husûsa bu vech üzre şâhidleriz şehâdet dahi ederiz deyü her biri edâ-i şehâdet-i şer‘iye eylediklerinden sonra müvekkile-i mezbûre Rahime bi-zâtihâ hâzıra iken muvâcehesinde şehâdet-i mezbûrelerinde kâzib olmadıklarından şâhidân-ı mezbûrân tahlîf, keyfiyet-i hâlleri mahalleleri ahâlîsinden işbu hâzırûn bi’l-meclis Mustafa Efendi b. Nasuh ve Süleyman Çelebi b. Abdullah ve İbrahim b. Mustafa ve Ali b. Sefer ve Muslı b. Yusuf ve Hacı Mehmed b. İsmail ve Receb b. Ahmed ve Hacı İbrahim b. Abdullah ve Hacı Hüseyin b. Receb ve Ahmed b. Mehmed nâm kimesnelerden istifsâr olundukda her biri şâhidân-ı mezbûrân Abdülkadir Beşe ve Mehmed Beşe iyi âdemlerdir velev aleynâ makbûlü’ş-şehâdedir deyü mezbûrânın hüsn-i hâllerini haber vermeleriyle şehâdetleri makbûle olmağın mûcebince mezbûre Rahime bî-vech ta‘arruzdan men‘ birle mâ-vaka‘a bi’t-taleb ketb olundu. Fi’l-yevmi’l-hâdî ve’l-işrîn min-Zilhicceti’ş-şerîfe li-sene tis‘în ve elf. Şuhûdü’l-hâl: Fahrü’l-kuzât Abdülaziz Efendi b. Mustafa, Tayyar Ağazâde Ahmed Ağa b. ( ), Ahmed Beşe b. Murad, Mehmed Beşe b. Sefer, Abdullah Beşe b. Mehmed, Başeski Mehmed Beşe.