Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 136 Hüküm no: 96 Orijinal metin no: [25b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rahime bt. Mahmud’un otluk ahırını Mehmed’e sattığı Mahmiye-i İstanbul’da Koğacı Dede Mahallesi’nde Osman Paşa odalarının birinde sâkine Rahime bt. Mahmud nâm hatunun zevci ve tarafından husûs-ı âti’l-beyâna vekîl olduğu mezbûrenin zâtını ma‘rifet-i şer‘iye ile ârifân Osman b. Ali ve Şeyhzâde Mehmed Çelebi nâm kimesneler şehâdetleri ile şer‘an sâbit olan Hasan Beşe b. Ahmed meclis-i şer‘-i şerîf-i lâzımü’t-teşrîfde bâ‘isü hâze’l-kitâb el-Hâc Mehmed nâm kimesne mahzarında bi’l-vekâle ikrâr ve takrîr-i kelâm edip akd-i âti’z-zikrin sudûruna değin müvekkilem mezbûre Rahime’nin yedinde mülkü olup mahmiye-i mezbûre hısnı ebvâbından Edirnekapısı hâricinde vâki‘ iki tarafdan mezaristân ve bir tarafdan benim mülküm ve bir tarafdan tarîk-ı âm ile mahdûd bir otluk ahırını cümle tevâbi‘iyle tarafeynden îcâb ve kabûlü hâvî bey‘-ı kat‘î ile mezbûr el-Hâc Mehmed’e yirmi beş esedî guruşa bey‘ ve teslîm ol dahi iştirâ ve tesellüm edip semeni olan meblağ-ı mezbûr yirmi beş esedî guruşu müvekkilem mezbûre Rahime Hatun mezbûr el-Hâc Mehmed yedinden tamamen ahz ü kabz edip ba‘de’l-yevm zikrolunan otluk ahırı mezbûr el-Hâc Mehmed’[in] mülk-i müşterâsı olmuşdur keyfe mâ yeşâ’ ve yahtâr mutasarrıf olsun dedi dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sânî min-Muharremi’l-harâm li-sene ihdâ ve tis‘în ve elf. Şuhûdü’l-hâl: el-Hâc Ramazan b. ( ), Mehmed Çelebi b. Haydar, Hüseyin Efendi el-kâtib, Mustafa b. (...), Mustafa b. Abdullah.