Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 136 Hüküm no: 97 Orijinal metin no: [26a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mehmed Beşe’nin terekesinin kardeşi olduğu ispatlanan Şaban adlı kişiye teslim edilmesi Fi’l-asl Vilâyet-i Anadolu’da Akyazı kazâsına tâbi‘ Kasaba-i Hendek ahâlîsinden olup mahmiye-i İstanbul’da Çırakçı Hamza Mahallesi’nde sâkin bâ‘isü hâze’l-kitâb Şa‘ban nâm kimesne meclis-i şer‘de sâbıkā yeniçeri ağası olup bilâ-vâris vefât eden yeniçeri tâifesinin terekesini beytü’l-mâl için ahz ü kabza me’mûr olmağla zikri âtî terekeye vâzı‘u’l-yed olan iftihârü’l-emâcid ve’l-ekârim câmi‘ü’l-mehâsin ve’l-mekârim Mustafa Ağa b. el-merhûm Kara Hasan Ağa tarafından husûs-ı âti’z-zikre sâbitü’l-vekâle vekîl olan Süleyman Çelebi b. Bali nâm kimesne mahzarında üzerine da‘vâ ve takrîr-i kelâm edip Dergâh-ı âlî yeniçerilerine mahsûs yirmi sekizinci oda yoldaşlarından olup bundan akdem Bağdad muhâfazasında iken vefât eden Mehmed Beşe’nin ben li-ebeveyn karındaşı olup babamız ismi İbrahim ve ceddimiz ismi el-Hâc Ahmed ve vâlidemiz ismi Fâtıma ve maskat-ı re’simiz kasaba-i mezkûrede olup müteveffâ-yı mezbûrun benden gayrı vârisi ve terekesine müstahakk-ı âhar kimesne olmayıp verâseti ancak bana münhasıra iken müvekkil-i mûmâ-ileyh ber-mûceb-i defter-i kassâm cümle muhallefâtına beytü’l-mâl olmak üzre vaz‘-ı yed eder suâl olunup ihkāk-ı hak olunmak matlûbumdur dedikde gıbbe’s-suâl mezbûr Süleyman Çelebi müvekkil-i mûmâ-ileyh tereke-i müteveffâ-yı mezbûra vaz‘-ı yedini ikrâr lâkin müdde‘î-i mezbûrun ber-vech-i muharrer verâsetini inkâr edicek müdde‘î-i mezbûrdan vech-i muharrer üzre müdde‘âsını mübeyyine beyyine taleb olundukda udûl-i Müslimînden olup kasaba-i mezbûre ahâlîsinden Mehmed Çelebi b. Ali ve el-Hâc İbrahim nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müdde‘î-i mezbûr Şa‘ban ile müteveffâ-yı mezbûr Mehmed Beşe li-ebeveyn karındaşlar olup babaları ismi İbrahim ve cedleri ismi el-Hâc Ahmed ve vâlideleri ismi Fâtıma ve maskat-ı re’sleri kasaba-i mezbûrda olup müteveffâ-yı mezbûrun müdde‘î-i mezbûrdan gayrı vârisi ve terekesine müstahakk-ı âhar kimesne olmadığı ma‘lûmumuz olmayıp müteveffâ-yı mezbûrun verâseti ancak mezbûr Şa‘ban’a münhasıradır biz bu husûsa bu vech üzre şâhidleriz şehâdet dahi ederiz deyü her biri edâ-i şehâdet-i şer‘iye etdiklerinde ba‘de’t-ta‘dîl ve’t-tezkiye şehâdetleri makbûle olmağın mûcebince müdde‘î-i mezbûrun ber-vech-i muharrer verâsetine ba‘de’l-hükm tereke-i müteveffâ-yı mezbûru müdde‘î-i mezbûra def‘ ve teslîme vekîl-i mezbûra tenbîh birle mâ-vaka‘a bi’t-taleb ketb olundu. Fi’l-yevmi’s-sâdis min-Muharremi’l-harâm li-sene ihdâ ve tis‘în ve elf. Şuhûdü’l-hâl: Fahrü’l-akrân Mehmed Ağa Kethudâ-yı Hazret-i Efendi, el-Hâc Mustafa b. Çukadâr, Ali Çelebi b. Abdullah, Mehmed Çelebi b. Haydar, Ahmed Çelebi b. Piyale.