Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 137 Hüküm no: 98 Orijinal metin no: [26a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hayrunnisa Hatun bt. Şaban’ın mirasla ilgili alacak davasının reddedildiği Mahmiye-i İstanbul’da Koğacı Dede Mahallesi’nde sâkin iken bundan akdem vefât eden İmâm Mehmed Efendi b. Ahmed’in verâseti zevce-i menkûha-i metrûkesi [Sâniye] Hatun bt. Mehmed Efendi’ye ve babası mezbûr Ahmed Efendi’nin li-ebeveyn kız karındaşı Hayrunnisa Hatun bt. Şa‘ban’a münhasıra olup ve tashîh-i mes’elesi dört sehimden i‘tibâr olunup sihâm-ı mezbûrenin bir sehmi mezbûre Sâniye Hatun’a ve sülüs-i erbâ‘ı mezbûre Hayrunnisa’ya isâbet eylediği şer‘an mütehakkık oldukdan sonra mezbûre Hayrunnisa tarafından vürûdu müsbit nakl ile vekîl [ve] dâmadı Ali Çelebi b. Hasan meclis-i şer‘-i hatîrde mezbûre Sâniye tarafından husûs-ı âti’l-beyân[d]a husûmet ve cevâba müseccel vekîl [olan] bâ‘isü’l-kitâb Mehmed Efendi b. Şeyhzâde Abdullah Efendi mahzarında bi’l-vekâle üzerine da‘vâ ve takrîr-i kelâm edip müteveffâ-yı mezbûr Mehmed Efendi mâlından mahmiye-i mezbûrede Beyceğiz Mahallesi’nde sâkin İsmail Çelebi zimmetinde cihet-i deyn-i şer‘îden sâbit ve mütekarrir olan bin altı yüz elli kıt‘a esedî guruşu müvekkil-i mezbûre Sâniye Hatun kendi mâlı olmak üzre alıp bi-gayr-ı hakkın cümlesine vaz‘u’l-yed ve zabteylemişdir suâl olunup meblağ-ı mezbûrun sülüs-i erbâ‘ı olup müvekkil-i mezbûre Hayrunnisa’ya isâbet eden bin yüz altmış iki buçuk guruşu taleb eylediğimde müvekkil-i mezbûre Sâniye Hatun bana teslîmden imtinâ‘ eder suâl olunup alıverilmesi matlûbumdur dedikde gıbbe’s-suâl vekîl-i mezbûr Mehmed Efendi müvekkilesi Sâniye Hatun’un müdde‘âda olan meblağ-ı mezbûr kendi mâlı ve hakkı olmak üzre vaz‘-ı yedini bi’l-vekâle ikrâr ve müdde‘î-i mezbûrun müdde‘âsını inkâr edicek müdde‘î-i mezbûrdan sıdk-ı makāline beyyine taleb olundukda ityân-ı beyyineden izhâr-ı acz edip istihlâf etmeğin müvekkil-i mezbûre alîle ve sahibet-i firâş olmak ile meclis-i şer‘a huzûru müte‘azzir olduğu i‘lâm olunmağın kıbel-i şer‘den bi’l-iltimâs tahlîf için Mevlânâ Osman Efendi b. Mehmed irsâl olunup ol dahi mahmiye-i mezbûrede Karabaş Mahallesi’nde hâlâ müvekkil-i mezbûrenin sâkine olduğu menzile varıp zeyl-i kitâbda isimleri mastûr olan Müslimîn huzûrunda akd-i meclis-i şer‘-i şerîf etdikde mezbûre Sâniye Hatun’un zâtı zikrolunan Koğacı Dede Mahallesi’nde sâkin Abdülkadir Çelebi b. Ali ve Abdülbaki Çelebi b. Mustafa ta‘rîfleriyle mu‘arrefe oldukdan sonra mezbûr Ali Çelebi huzûrunda mevlânâ-yı mezbûr meclis-i ma‘kūd-ı mezbûrda Sâniye Hatun’a zikrolunan bin beş yüz elli kıt‘a esedî guruş müteveffâ-yı mezbûr Mehmed Efendi’nin mâlı ve hakkı olup bi-gayr-ı hakkın cümlesine vaz‘-ı yed etmediğine yemîn teklîf etdikde ol dahi ve alâ-vefki’l-mesûl [yemîn billâhi’l-aliyyü’l-a‘lâ etmeğin] mevlânâ-yı mezbûr mahâllinde tahrîr ve ba‘dehû ma‘an irsâl olunan Ali Çelebi b. ( ) ve Mehmed Çelebi b. Abdurrahman ile meclis-i şer‘a gelip ve alâ-vukū‘ihî inhâ [ve] takrîr etmeğin vekîl-i mezbûr Ali Çelebi husûs-ı mezkûra müte‘allik mezbûre Sâniye Hatun ile bilâ-beyyine mu‘ârazadan men‘ birle mâ-hüve’l-vâki‘ ketb olundu. Fi’l-yevmi’s-sâdis min-Muharremi’l-harâm li-sene ihdâ ve tis‘în ve elf. Şuhûdü’l-hâl: Abdullah Efendi b. Şeyh Ahmed Dersi‘âm, fahrü’l-müderrisîn es-Seyyid Mustafa Efendi b. ( ), Hüseyin Efendi b. Yunus, Mehmed Çelebi b. Şa‘ban, Hüseyin Çelebi b. Mehmed.