Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 138 Hüküm no: 99 Orijinal metin no: [26b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva bt. Mahmud Efendi’nin arsasını Yakomi v. Yani’ye sattığı Mahmiye-i İstanbul’da Molla Fenârî Mahallesi’nde sâkine Havva bt. Mahmud Efendi nâm hatun meclis-i şer‘-i hatîr-i lâzımü’t-tevkīrde bâ‘isü’s-sifr Yakomi v. Yani nâm zimmî muvâcehesinde bi’t-tav‘i’s-sâf ikrâr ve takrîr-i kelâm edip mahmiye-i mezbûre hısnı ebvâbından Fener kapısı hâricinde vâki‘ bir tarafdan Hüseyin Ağa nâm kimesne Yahûdihânesi ve bir tarafdan yeniçeri efendisi Yahûdihânesi ve bir tarafdan sâhil-i bahr ve bir tarafdan tarîk-ı âm ile mahdûd tûlen ve arzan bi-hesâb-ı terbî‘î iki yüz kırk altı zirâ‘ arsalı mülküm olan Yahûdihânenin ebniyesi târih-i kitâb senesinden bir ay mukaddem olan harîkde bi’l-külliye muhterik olup arsa-i sırfa kalmağla zikrolunan arsanın nısfı olup mezbûr Hüseyin Ağa tarafından yüz yirmi üç zirâ‘ arsa ile içinde olan taşlarını tarafeynden îcâb ve kabûlü hâvî bey‘-ı kat‘î ile üç yüz altmış beş esedî guruş ve meclis-i akidde mevcûd min-haysü’l-işâre ma‘lûme ve min-haysü’l-kemmiye mechûle bir kabza fülûs-ı muzayya‘aya mezbûr Yakomi’ye bey‘ ve teslîm ol dahi iştirâ ve tesellüm ve kabûl ettikten sonra semeni olan meblağ-ı mezbûr üç yüz altmış beş esedî guruş ile bir kabza fülûs ba‘de’l-ahz ve’l-kabz fülûs izâ‘at eyledim ba‘de’l-yevm arsa-i mezbûre ve taşları mezbûr Yakomi’nin mülk-i müşterâsıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâdis min-Muharremi’l-harâm li-sene 1091. Şuhûdü’l-hâl: Ahmed Efendi b. Hüseyin, Mehmed Çelebi b. Hüseyin el-müezzin, Musa Çelebi b. ( ), Ahmed Çelebi b. Piyale.