Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 139 Hüküm no: 100 Orijinal metin no: [26b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muharrem Çelebi ve Mehmedcan’ın mirasla ilgili alacak davasının reddedildiği Mahmiye-i İstanbul’da Dâye Hatun Mahallesi’nde sâkin iken bundan akdem vefât eden Küçük Emir demekle ma‘rûf es-Seyyid Mehmed Çelebi b. es-Seyyid Mehmed[‘in] verâseti zevce-i metrûkesi İsmihan [bt.] el-Hâc Veliyüddin [ile] li-üm karındaşları es-Seyyid Mustafa Çelebi ve es-Seyyid Ahmed Çelebi’ye ve ammi oğulları Muharrem Çelebi ve Ali Çelebi ve Murad Çelebi ve Abdülkerim Çelebi ve Mahmud Çelebi ve İbrahim Çelebi ve Şeyh Osman Çelebi’ye münhasıra olup ba‘dehû mezbûr Mahmud Çelebi dahi fevt olup verâseti sulbî kebîr oğulları Mehmedcan ve Alican ve Receb ve sulbiye kebîre kızı Sâliha’ya münhasıra olup ba‘dehû mezbûr Abdülkerim Çelebi dahi vefât edip verâseti zevce-i metrûkesi ( ) ile sulbî kebîr oğlu Murtaza’ya ve kızı Afîfe’ye münhasıra olduğu şer‘an zâhir ve müte‘ayyin oldukdan sonra mezbûr Muharrem Çelebi asâleten ve merkūm Mehmedcan kendi tarafından asâleten ve karındaşları mezbûrûn Alican ve Receb ve Sâliha taraflarından husûs-ı âtîye vekîl olduğu Nasuh Çelebi b. Abdülkadir ve mezbûr Muharrem Çelebi şehâdetleriyle şer‘an sâbit olmağla vekâleten meclis-i şer‘-i hatîrde işbu bâ‘isü’l-kitâb mezbûr es-Seyyid Ahmed Çelebi mahzarında her biri üzerine da‘vâ ve takrîr-i kelâm edip mezkûr es-Seyyid Ahmed Çelebi müteveffâ-yı mezbûrun ber-mûceb-i defter-i kassâm cemî‘ terekesi olan otuz iki bin dokuz yüz kırk beş kıt‘a esedî guruşu bi’l-emâne ahz ü kabz eyleyip meblağ-ı mezbûru defter-i mezbûr nâtık olduğu üzre her birinin mazmûnu müsbit hüccet-i şer‘iyeler mûcebince erbâb-ı düyûna tamamen izn-i hâkim ile edâ ve îfâ eylediğinden sonra yine müteveffâ-yı mezbûrun terekesinden ma‘lûmü’l-mikdâr çivid bahâsı olan on üç kîse ve Harmuş Paşası yedinden yirmi dört kîse cem‘an otuz yedi kîsesini kezâlik ahz ü kabz etmeğin hâlâ asâleten ve vekâleten zikrolunan otuz yedi kîseden bize isâbet eden hisse-i şer‘iyeden mezbûr es-Seyyid Ahmed Çelebi’den taleb ederim suâl olunsun dedikde gıbbe’s-suâl ve akībe’l-inkâr mezbûrân Muharrem Çelebi ve Mehmedcan’dan takrîr-i meşrûhlarına mutâbıka beyyine taleb olundukda ityân-ı beyyineden izhâr-ı acz ve istihlâf etmeğin fi’l-hakīka müteveffâ-yı mezbûrun terekesinden ber-vech-i muharrer çivid bahâsı olan on üç kîse ve Harmuş Paşası yedinden yirmi dört kîse cem‘an otuz yedi kîsesini ahz ü kabz etmediğine mezkûr es-Seyyid Ahmed Çelebi’ye yemîn teklîf olundukda ol dahi bi-hasebi’l-mesûl half billâhi’l-aliyyü’l-azîm etmeğin mûcebince mezbûrân Muharrem Çelebi ve Mehmedcan bilâ-beyyine ta‘arruzdan men‘ birle mâ-vaka‘a bi’t-taleb ketb olundu. Fi’l-yevmi’l-hâmis min-Muharremi’l-harâm li-sene ihdâ ve tis‘în ve elf. Şuhûdü’l-hâl: Ataullah Çelebi b. Şemhalızâde, es-Seyyid Mahmud Çelebi b. Hamidîzâde, es-Seyyid Abdülkerim Çelebi [b.] Salahaddin, es-Seyyid Mehmed Çelebi.