Bab Mahkemesi 54 Numaralı Sicil (H. 1102 / M. 1691) cilt: 20, sayfa: 322 Hüküm no: 385 Orijinal metin no: [66a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emetullah bt. Yusuf’un Hasan Bey b. Çelebi’den muhâlaa yoluyla boşanması Husûs-ı âti’l-beyânın mahallinde ketb ve tahrîri için bi’l-iltimâs savb-ı şer‘-i âlîden irsâl olunan Mevlânâ Abdullah Efendi b. el-Hâc Veli mahmiye-i İstanbul’da Debbâğ Yunus mahallesinde sâkin Yusuf Bey b. Abdullah’ın menzilinde, zeyl-i kitâbda muharrerü’l-esâmi müslimîn huzûrlarında akd-i meclis-i şer‘-i mübîn eyledikde, mezbûr Yusuf Bey’in sulbiye sagīre kızı olup zâtını ma‘rifet-i şer‘iyye ile ârifân mahalle-i mezbûre sükkânından el-Hâc Mehmed b. Hasan [ve] Dilaver b. Abdullah nâm kimesneler ma‘rifetleriyle mu‘arrefe olan Emetullah nâm hâtun meclis-i ma‘kūd-ı mezkûrda, zevc-i dâhili bâ‘isü hâze’l-kitâb Hasan Bey er-râcil mahzarında ikrâr ve takrîr-i kelâm edip, mezbûr Hasan Bey zimmetinde mütekarrir ve ma‘kūdun-aleyh olan dört bin beş yüz akçe mehr-i müeccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzre ber vech-i mezbûr Hasan Bey ile muhâla‘a-i sahîha-i şer‘iyye ile muhâla‘a edip, ol dahi ber vech-i muharrer hul‘-ı mezbûru kabûl ettikden sonra hukūk-ı zevciyyete müte‘allika da‘vâdan her birimiz âharın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledik dedikde, gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde ketb ve tahrîr, ba‘dehû ma‘an ba‘s olunan İbrahim Çelebi b. Mehmed ve Mustafa Beşe b. Mehmed ile Meclis-i şer‘a gelip alâ vukū‘ihî inhâ ve takrîr etmeğin, mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn min Cumâdelâhire li sene 1102. Şuhûdü’l-hâl: Halil Çelebi b. Ahmed, İbrahim b. ( ), Mustafa b. Abdullah, Hasan İsmail Çelebi b. Abdullah, Osman Çelebi b. Mehmed, Mehmed b. Hasan, İbrahim Çelebi b. Ahmed ve gayruhüm.