Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 142 Hüküm no: 102 Orijinal metin no: [27a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâliha bt. Abdullah ile Ahmed b. Mehmed’in muhâlaa yoluyla boşandıkları Mahmiye-i İstanbul’da Uzun Yusuf Mahallesi’nde sâkine Sâliha bt. Abdullah nâm hatun meclis-i şer‘-i hatîrde zevci Ahmed b. Mehmed nâm kimesne mahzarında ikrâr ve takrîr-i kelâm edip zevcim mezbûr Ahmed’e zimmetimde deynim olan yirmi beş esedî guruşu ve yedimde olan beynimizde ma‘lûm bir kılıç ve beş guruş dahi zevcim mezbûra def‘ ü teslîm ol dahi ahz ü kabz eylediğinden sonra zimmetinde mütekarrir ve ma‘kūdün-aleyh olan üç bin akçe mehr-i müeccelimden ve nafaka-i iddet-i mu‘ayyenemden geçip meûnet-i süknâm dahi kendi üzerime olmak üzre zevcim mezbûr ile muhâla‘a-i sahîha-i şer‘iye ile muhâla‘a edip ol dahi hul‘-ı mezbûru kabûl edip hukūk-ı zevciyete müte‘allik da‘vâdan ve zimmetimde hakkı olan iki bin akçe da‘vâsından zimmetimi ibrâ-yı âmm-ı kātı‘u’n-nizâ‘la ibrâ ve ıskāt eyleyip ben-dahi hukūk-ı zevciyete müte‘allika cemî‘ da‘vâdan zevcim mezbûr Ahmed’in zimmetini ibrâ-yı âmm-ı râfi‘u’l-hisâm ile ibrâ ve ıskāt eyledim dedikde ve mukırra-i mezbûre Sâliha’nın vech-i meşrûh üzre cârî olan ikrâr ve takrîrini mezbûr İbrahim bi’l-muvâcehe tasdîk ve bi’l-müşâfehe tahkīk etmeğin mâ-hüve’l-vâki‘ bi’t-taleb ketb olundu. Fi’l-yevmi’t-tâsi‘ min-Muharremi’l-harâm li-sene ihdâ ve tis‘în ve elf. Şuhûdü’l-hâl: es-Seyyid Abdülkerim Çelebi b. es-Seyyid Mustafa, Osman b. Hüseyin, Ali b. Mehmed, Yusuf b. Abdullah, el-Hâc Hasan b. ( ).